سان بيدرو المغربية فكوب دافريك.. مغاربة خيمو فالبحر ونعشو اقتصاد المدينة (تصاور)

كتعيش مدينة سان بيدرو الإيفوارية ملي بدا كوب دافريك أجواء مغربية، والمدينة ولات بحال شي وحدة من المدن ديال بلادنا بعدما جاو لها المغاربة عمروها، ملي بدا كوب دافريك فالكوت ديفوار، باش يشجعو المنتخب الوطني المغربي.
حوالي 5 ألاف مشجع مغربي كينين دابا فسان بيدرو، العدد من المنتظر يتزاد من هنا ليوم الثلاثاء، موعد ماتش ثمن نهائي كوب دافريك بين المنتخب المغربي ومنتخب جنوب إفريقيا.
الشوارع والزناقي هنا فسان بيدرو عامرة بالمغاربة اللي كيدوزر النهار مبحرين فبلاج سان بيدرو، وكيمشيو بالليل لواحد لبلاصة سميتها "سيتي" وهي مركز مدينة سان بيدرو، يدوزو الوقت فكافي ديال مصطفى بنكيران، وهذا واحد المغربي مقيم هنا فسان بيدرو حل القهوة ديالو الشعبية للمغاربة كاملين اللي عندو واللي ما عندوش، وخالق معهم أجواء واعرة.
المغاربة اللي جاو لسان بيدرو لتشجيع المنتخب المغربي، مقسمين فالإقامة ديالهم ل 3 أنواع، كاين اللي خدا الأوطيل، وكاين اللي كرا فيلات وكاين اللي كاري شقق، وكاين نوع آخر هو اللي اختار يخيم فالبلاج ديال سان بيدرو.
وانت كتجول فبلاج سان بيدرو، ورديتي البال غيبانو لك مخيمات ديال عدد من المغاربة اللي دارو گياطنهم ومخيمين، وسط أجواء استثنائية، بحال هشام اللي قرر يعاود على التجربة ديالو وقال: "عايشين أجواء رائعة، ختارينا نگلسو فالطبيعة حيث كنحسو فيها بسعادة إضافية".
وكمل هشام: "حنا المغاربة مفاهمين هنا، ومنسجمين وناشطين ومتضامنين وكنبارطاجيو أي حاجة مع بعضياتنا الماكلة الشراب.. جينا بالبيكالات من المغرب للكوت الديفوار وحنا موالفين السفر والرحلات والعيش فالطبيعة وكنختارو نعسو فيها واخا تكون عندنا الفلوس زايدة".
المغاربة فسان بيدرو خالقين أجواء رائعة بزاف، وحتى الإيفواريين عجبوهم الحال خصوصا هنا فسان بيدرو، حيث خالقين معهم السعادة وفرحوهم ملي ساهم المنتخب المغربي فتأهل الكوت الديفوار إلى ثمن نهائي كوب دافريك بعدما كانو الفيال مقصيين، وتأهلو بفضل رباح الأسود على زامبيا، وبالإضافة لهادشي راه الجمهور المغربي هنا فسان بيدرو حرك الاقتصاد.
احمادو مواطن من سان بيدرو اكد ان المدينة كتعيش دابا واحد الانتعاش اقتصادي كبير دابا بفضل المغاربة، وهذا الشي ما كانش فالأيام العادية حيث كان الركوض والاستهلاك قليل، وبالمقابل دابا ومع المغاربة الرواج مجود وبالبيع والشرا خدام، وحتى الفنادق والسماسرية خدامين.