مزيان دنيا باطما تدخل للحبس. مزيان تربى هي وخواتاتها وتنقي عائلة اسطورية وباش تربى ممكن يعفو عليها سيدنا مع بوعشرين والريسوني والراضي وزيان

دنيا باطما دخلات لحبس لوداية فمراكش. دابا دوزات الليلة الثالثة. حبسها تربية ليها. راها ايلى دوزات عام غادية تخرج وحدة اخرى. ممكن تديها لفنها كيف كنعرفو علي العائلة الاسطورية ديالها. كلهم تعرفو بفنهم. كلهم تشهرو باعمالهم. من العربي لمحمد ودوز على حميد باها ورجع لطارق وحتى لخنسا. دابا خرجو جوج. دنيا عندها صوت واعر وتصرفات حقيرة وابتسام لا صوت لا اخلاق.
باطما كانت تشد باش تشدات اختها. كانت تعتاقل نهار نزلات ديك الغبية ديال گلامور للي دانها القضاء فقضية حمزة مون بيبي٬ المهم تزگلات وعوض تركز على خدمتها. دير شي اغنية ديالها عوض ما تغني اغاني تراثية بحال خربوشة٬ ما بغاتش تاخد الدرس. باش تسنى حكم فمحكمة النقض خاصك على الاقل تجنب لمعاطية. تعلم تسكت. هاد الضاصرة ديال باطما بقات عاطياها للمعاطية. وصلات بيها الوقاحة حتى قللات احترامها على سيدنا باش خرجات كتطلب العفو فانستغرام. لايف تبعو اكثر من 100 الف واحد. رسالتها اهانة للقضاء وطلب العفو من الملك اللي باسمو صدر الحكم عليها.
طبعا دازت ايام وطبق فيها القانون.
دابا واش ممكن تاخد العفو؟ طبعا ممكن ولكن شرط يدوز بطرقو المعهودة ماشي فانستاكرام. واش لمغاربة غاديين يقبلو تاخد العفو؟ ممكن بعد ما دوز على الاقل نصف المدة٬ ولكن خاصو يكون عفو ماشي غير عليها. خاصو يكون عفو علي الصحافيين توفيق بوعشرين وسليمان الريسوني وعمر الراضي بالاضافة الى المحامي محمد زيان وناس الحراك. الصحافيون كاين اللي دوز ثلثي المدة٬ يعني بسلوكهم ممكن يخرجو. ايلى جا عفو مزيان.
سيدنا كيصدر عفو علي ارهابيين كانو باغيين خلافة فالمغرب وكانو كيوجدو اعمال ارهابية٬ لا علاقة لهاد الارهاب بما حكم به الصحافيون الثلاث اللي خاصهم عفو ملكي ايلى طلبوه.
عفو علي باطما بلا الصحافيين وزيان غادي يكون ما عندو معنى. ايلي خرجو كلشي كيبان معقول فبلاد محتاجة لانفراج حقوقي. طبعا باطما ما عندها علاقة بالانفراج. كنهدرو علي الصحافيين والحقوقيين