فاجتماع عادي وعلى غير العادة.. روسيا خفضات تمثيليتها الدبلوماسية اللي تلاقات مع وفد د البوليساريو

Elouali.zaz.1987@gmail.com
استقبلات وزارة الخارجية الروسية وفد عن جبهة البوليساريو كيضم كل من سيدي محمد عمار ممثل البوليساريو فنيويورك، وفاطمة المهدي عضو أمانة البوليساريو، وعلي سالم محمد فاضل ممثل البوليساريو فروسيا.
الاستقبال عادي وكيدار بصفة سنوية ودائما كيكون بين شهري فبراير ومارس، والغرض منو هو التواصل وإلمام روسيا بمستجدات نزاع الصحراء وتطوراتو، بالإضافة لموقف جبهة البوليساريو، بحكم أن روسيا معنية بيه لأنها عضوة فمجموعة أصدقاء الصحراء الغربية فمجلس الأمن الدولي وواحدة من القوى اللي مهتمة بالنزاع خاصة فظل صراع القطبية مع الولايات المتحدة الأمريكية المحتكر الرئيسي للملف، وسعي كل قوة لإحراج الأخرى.
الملاحظ فهاد الاستقبال اللي عادي ودوري هو تخفيض روسيا لتمثيليتها الدبلوماسية اللي تلاقات جبهة البوليساريو، بحيث كلفات ألكسندر كينشاك، مدير قسم الشرق الأوسط وشمال أفريقيا بوزارة الخارجية الروسية، أنه يتلاقى هاد الوفد على غير العادة ويتباحث معاه.
فالحالات العادية ديال روسيا بحال سنتي 2021 و2022 والسنوات الماضية كان المبعوث الخاص للرئيس الروسي إلى الشرق الأوسط وإفريقيا، نائب وزير الخارجية ميخائيل بوغدانوف، هو اللي كيتلاقى وفود البوليساريو ويتباحث معاها، ولكن هاد العام ما شفناش هادشي، الشي اللي كيطرح علامات استفهام حول هاد التخفيض وبالطبع غادي يكون عندو إيحاء، لاسيما وأننا شفنا التقارب المغربي الروسي من خلال المنتدى الروسي العربي اللي تنظم فمراكش فدجنبر 2023، واللقاء بين وزير خارجية روسيا سيرگي لافروف ووزير الشؤون الخارجية والتعاون الإفريقي والمغاربة المقيمين في الخارج، ناصر بوريطة، واللي ممكن يكون دافع لدينامية جديدة فالعلاقات مع موسكو.