النصب بالقرآن. كيفاش خلق طبيب أسنان الكوشتين بيه باش يولي ملايري

الدين عندو تأثير هارب على الناس، الدين تايدير للناس الهشاشة فالقلب، تايوليو حنان، تايترخاو وتايتيقو أي تخربيقة واخا تكون باينة من المريخ أنها تخربيقة تصرفيقة.
دير غير نظرة مزروبة على التاريخ وغا تلقى أمجنن قصص النصب الديني. ولا بلا ما تمشي للتاريخ، النصب ليوم أكبر حيت الانترنت حلات باب النصب على العالم كامل.
الدين فيه لفلوس، بزاف ديال لفلوس. الدين دجاجة بكامونها وبزارها وملحها. للي ما لقا ما يدير تايلقا فالدين وجيبة ساهلة ماهلة ياكل منها خبيز. شنو تايطرا مين تايتلاقا نصاب بإسم الدين مع ضحية متأثر بالخطاب الديني؟ تخويرة سانك سانك!
هاد النصابة، واخا عندهم أداة الدين السحرية للي تايلعبو بيها على عقول المغيبين، عندهم عوتاني الإبداع، ها النصاب الكوميدي، ها النصاب لحلايقي، ها النصاب الرياضي. آخر ما كاين فالإبداع هو للي وصل ليه طبيب الأسنان يونس الشرايبي، مؤسس "الكوتشينغ بالقرآن". إييه نعاماس، كيفما قريتيها: "الكوتشينغ بالقرآن". كل حصة غا تقام عليك بغسيل الفندق باش يعزم عليك واحد ولد العبد بآيات قرآنية.
تانفكر فدوك للي مشاو قراو ودارو تكوين وشهادات وجا فالأخير هاد خونا بزيرو مؤهلات هاز قرآن وتايدي ليهم الكليان.
تقدر تقول ليا هادشي ماشي شي حاجة واللي بغا يدير شي ستون يديرو واللي عطا كلاويه لهلا يداويه، غا نقول ليك لا، هاد الاحتيال باسم الدين تقدر تولي عندو عواقب خطيرة. بحالاش؟ هاد التنافس على حلوى النصب باسم الدين يقدر يخرج لينا شي ولاد الهاربات يوليو يديرو لينا الخيال العلمي بحال علاج السرطان بالقرآن، علاش لا؟ مال السرطان ماشي راجل؟ عشيرنا الشرايبي براسو، باش ضمنا أنه ما يديرهاش مع شي مريض فعوض ما يقول ليه سير تتعالج عند الأطباء.
الزواج بالقرآن، الطلاق بالقرآن، التغذية بالقرآن، التعليم بالقرآن، العملات الرقمية بالقرآن.. كلشي بالقرآن.
واش كلام الله رخيص لهاد الدرجة أن من هب ودب يدير منو سبوبة؟
هاد الزعت محتاج تأطير، خاص وزارة الأوقاف والشؤون الإسلامية تدير خدمتها، ما يمكنش نزيدو عصابة جديدة على عصابة الرقية (غير) الشرعية للي دايرة خبلة ومرونة الدنيا.
شنو تانتسناو؟ أن شي فضيحة توقع عاد نتحركو ونتباكاو؟