فواحد الوقت كانو عندنا قليل ديال النساء لي كيمارسو السياسة والنضال، وأغلبيتهم كانو في الأحزاب اليسارية، وكانو كيشكيو من العقلية الذكورية لي كانو كيقولو بلي منتشرة فالأحزاب والنقابات والجمعيات والدولة. صحيح أنهوم كانو قلالات، ولكن ما ننفيوش أنو كان عندهوم تكوين سياسي وثقافي عالي، وأنهم فرضو نفسهوم بالعمل والقدرة على إنتاج الأفكار، وواخا أن الرجال ديك الساع في الأحزاب في مجالسهم الخاصة، كيتشكاو من المبالغات لي كانو كيقولو أن هاد النسوانيات كيطالبو بها، إلا أنه كانو كيحتارموهوم وكيقدرهوم، وكانوا كاع كيخافو منهوم ليديو ليهوم مناصبهم القيادية. اليوم، ومع السوشل ميديا، ظهر نوع جديد ديال "المناضلات" لا علاقة له بالمناضلات المثقفات والواعيات، ولي عندهوم قضية واضحة، وخطاب راقي، وكيعتمدو المرجعية الكونية لحقوق الإنسان. هادو شكل ثاني، واخا كيقولو على راسهوم حقوقيات، ولكن فاش كتفرج في اللايفات ديالهوم، أو كتقرا الستاتوهات لي كيحنشو، مكاتلقى حتى فرق بينهوم وبين ولد الشينوية في المعايطة. والغريب أن المعايطة ديالهوم كتركز على الوصم في النساء من جنسهن، خطاب فيه واحد اللاوعي محافظ ورجعي ديال احتقار المرأة. ويستوي في ذلك "المناضلات اللايفيات" لي كيقولو بلي كيدافعو على الدولة، أو لي كيقولو معارضات، أو لي ما تعرفهوم معنا ولا مع غانا. عادي عندهوم واحدة تقول للأخرى: جارية فلان، وواحدة تعاير صاحبتها بلي هرب عليها الرجل، وخلاها كتنعس فالليل بوحدها، ولوخرا تجاوبها بالبايرة. كنا كنعرفو قبل في السياسة، أن التشهير مثلا كيكون بلي فلان مخبر، أو فلان دار لاباس من ورا الحزب، أو عندو علاقات مشبوهة. اليوم مع معاطية ديال هاد الوجوه لي نبتت فجأة، تضربات كل مجهودات النساء لي بناو الحركة النسائية في ظروف صعبة، تضربات في الزيرو، ملي ظهرو هاد النساء لي كيدويو على خصومهم السياسيين (واخا يكونو هاد الخصوم معارضين) بلي هاد شاد جنسي، ولاخور كيخاف من مرتو، وواحدة معارفاش واليديها، وواحدة سارقة الرجل وكتخلص النفقة لطليقتو، وفلان مو كانت كتبيع جسدها للكزار ومول النعناع،، وبلا مندويو على الإيحاءات الجنسية في اللايفات والستاتوهات. وهادشي كيعكس ماشي قلة الترابي، ولكن أنهوم في العمق محافظات وتقليديات ورجعيات، وعندهوم نفس التصور لي كينقص من المرأة، وأنهم براسهوم رغم أنهم نساء، عندهوم مشكل مع النساء، واخا يدعيو أنهوم حقوقيات وتقدميات. حنا ما عارفينش منين جاو، حتى لقيناهوم في السوشل ميديا، بحال ما لقينا ولد الشينوية، مغنتهمو حد بلي مخدمهم، حيت مكنضونش شي مؤسسة بعقلها ممكن تسلط بحال هادو على عباد الله، ومغنقولوش بلي هوما كيعرضو خدماتهم، حيت واخا يكون هادا صحيح، الله يسخر لكل واحد، واخا كيعرضو سلعة بيريمي، حيت المعاطية بديك الشكل فالسياسة كتجيب غير الضحك على مولاها، ولكن ما فيها باس نقولو للناس لي ربما قريبة منهوم أنها تنصحهم، خصوصا لي كيدعيو هوما نيت انهم على اتصال بهم تصريحا أو تلميحا، حيت هاد الشي بسال، وولى كيسيء لمؤسسات وأشخاص محترمين سوا في الدولة او في الإعلام.
