الزواج : مال بزاف د المغربيات ملهوفات عليه وعلاش؟

هاد القضية ديال حنان والفيزازي، ثم التحليل ديالها من جميع النواحي، ها لي هدر على استغلال الدين من طرف الشيخ، ها لي هدر على العائلة ديال البنت، ها لي تطرق للماضي ديال الفزازي الشامخ والمثالي، وحتى الزميل ديالي المحترم "سقراط" هدر على الرقية الشرعية والعواقب ديالها فالمجتمع ديالنا.
انا لي بغيت نهدر عليه و لي كايبانلي ظاهرة متفشية عندنا فالمغرب هي اللهفة على الزواج، الأغلبية ديال المغربيات عندهوم الهدف ديال حياتهوم هو يتزوجو. ماتقولوليش الله يجازيكم بخير السبب هو الفقر و الإستقلال المادي وانعدام الخيارات! ايه، فبزاف ديال الحالات الكارطة الرابحة الوحيدة ديال البنت كتكون هي الزواج واخا من واحد الفيزازي. واخا شارف. واخا ميكروب… حيت لامادارتش هكاك غيخصها تقحب ولا تضرب تمارة فديور عباد الله. ولكن لا، هاد الظاهرة مكاتختاسرش غي على "حنان وخواتاتها"، حاضرة عند العيالات من جميع الطباقات الإجتماعية وجميع المستوايات الدراسية، فالعروبيات و فالمودون، وفالمغرب كامل.
كاين عيالات قراو وتخرجو وخدمو (طبيبات مهندسات، استاذات..) وكتلقاهوم غي تزوجو كلسو فالدار يقابلو بوركابي، شحال من وحدة كتخرج من القراية قبل ماتكمل حيت صافي لقات الراجل ومنهوم عدد مكايقراوش كاع، كيتعلمو يشقاو ويطيبو ويقابلو باش نهار كيجي فارس الأحلام كيوليو خدامات ديالو.
معلوم تبغي تزوج وتدير عائلة ماشي عيب بلعكس سنة الحياة هاديك، العيب هو تكون ماعند باباك حتى شي هدف خور من غير تسني عند العدول، تكون كتنعس وتفيق في انتظار عقد النكاح.
السؤال لي كيتحط هو علاش؟ علاش بزاف ديال المغربيات كيفكرو بحال هكا؟ كفاش مكيهتمو لا بقرايتهوم، لا بمستقبالهوم المهني، ولا ب الإستقلال ديالهوم و باغيين غي الزواج؟
بالنسبة ليا الجواب هو المجتمع والترابي. عندنا ف 2017 مازال كنستعملو "البايرة، ذاز عليها التران، فات فيها الفوت , ضاربة الطريق, تحبرات …" كمعيورات و كنفكرو بلي وحدة لي فاتت العشرينات و ماتزوجات اذا فيها شي عيب، و يمكن ليك تكوني مرا مستقلة ماديا، مخاصك حتى خير، عندك بوسط مقود وبمجرد انك مامزوجاش غيعتابروك فاشلة فحياتك. و فالتربية ديالنا كنكبرو البنات الصغار على اساس النجاح فالحياة هو يدبرو فراجل ويعقدو معاه على سنة الله ورسوله. من الصغر وهما كيسمعو الولد كيتقاليه "قرا وخدم ودمر باش تكون راجل و تنجح فحياتك" وهما كيتقال ليهوم "حافظي على شرفك و كوني حادكة وفيك الأنوثة باش تدي سيد الرجال".
نهار مانبقاوش نعمرو الدريات صغار بهاد الفكر الخرائي ونوليو مجتمع كيحتارم المرا على قرايتها وفكرها وقيمتها الذاتية غيوليو عندنا عيالات ديال بصح ماشي اميرات زوجي وقرة عين راجلي.