أحرار ل"كود": صورتي كنهديها لمارلين وقفطانك محلول و"البي جي دي"

واش صورتك الجميلة بالقفطان رد على تصريحات بوليف المنتقدة والهجومية على أداءه لمسرحية "كفر ناعوم"؟
أنا ما رادت على حتى شي واحد. كل واحد وقراءتو لهاديك الصورة. أنا فنانة وممثلة وردي غادي يكون فني ماشي بالصور.

وصورتك بالقفطان؟
هاديك درتها وفكرت فمارلين مونرو، لهذا أهديها إلى مارلين مونرو وإلى الأغنية المغربية الجميلة "قفطانك محلول".

كيفاش تلقيتي انتقادات القيادي في حزب "العدالة والتنمية" نجيب بوليف على إذاعة "أطلانتيك"؟
هو كيكول هاديك الهدرة وأنا بغيتو بعدا يجي للمسرحية ويشوفها، أما النقد راه مافيهش الأخلاق، اللي بغى ينتقد خاصو الآليات الفنية والاستتيقية.

خايفة من وصول الإسلاميين للحكومة وإمكانية حربهم على الفن؟
ما خايفاش ما مخلوعاش. عندنا دستور جديد كيضمن لي وللمغاربة حرية الاختلاف. أنا اللي كيخلوني هما ناس الحداثة اللي عقولهم متحجرة، ودوك الفنانين والفنانات اللي كيديرو الزبايل وكيجيوا يهدرو على الأخلاق. أما العدالة والتنمية راهم واضحين مع ريوسهم كيفما أنا واضحة مع راسي.

هما عندهم أفكار كيدافعو عليها وأنا عندي أفكار كندافع عليها.

قلتي ل"كود" باللي ردك غادي يكون فني على "العدالة والتنمية"، كيفاش؟
غادي نستمر نعرض مسرحيتي "كفر ناعوم". العروض المقبلة ستكون بالدار البيضاء والرباط ومكناس.

غادي تعرضي على ناس البي جي دي؟
دايما كنعرض عليهم، وهاد المرة غادي نصيفط ليهم دعوة رسمية.

واش ما خايفاش من شي ردة فعل بعد إعادة عرض المسرحية؟
لكل حادث حديث