كيفاش جاتك لجنة المنوني؟ اختيار المنوني مافيه مشكل. السيد عندو التجربة ورجل قانون. انا عندي ملاحظات على الأعضاء لخراين، كان خاصهم يديرو ناس التيران اللي عارفين الواقع مزيان.
يعني عندك ملاحظات على تشكيلة اللجنة؟ إيلى كانت لجنة مواطنة خاص كل الطبقات والأديان يكونوا فيها، المسلمين واليهود، وخاصهم يستاشروا مع كلشي. راه خاص كل واحد يعاون باش نزيدو القدام ببلادنا. مثلا ما كاين حتى شي مغربي من الديانة اليهودية في اللجنة وغايبين ناس مزيانين، وحدة بحال سمية نعمان جسوس باحثة اجتماعية وبنت الميدان علاش ما اختاروهاش.
بالنسبة ليك علاش ما اختارو حتى واحد من المغاربة اليهود؟ فالواقع المغاربة اليهود كانوا ديما بعاد على السياسة ودابا عاد بداو يرجعو ليها.
ما كاينش شي تخوف من توسع المد المتطرف في المغرب مع هاد الانفتاح؟ حنا كنقلبو على الديموقراطية والعدالة وحقوق الإنسان، هاد الطريق اللي فيها حنا دابا راها مزيانة وكتأهلنا باش نوليوا ديموقراطية، أنا ما خايفاش على المستقبل. باش نوليو دولة حقوق الإنسان ما كاينش اللي غادي يخاف. لقد ناضلت كما ناضل آخرون من أجل الانتقال إلى مجتمع ديموقراطي.
علاش المغاربة اليهود، باستثناء أسماء قليلة جدا، بعيدة على الحياة السياسية؟ كيف ما كلت ليك اليهود كانوا ديما بعاد على السياسة فالمغرب المعاصر، ولكن كيخدمو بزاف فالمجتمع وكيتحركوا فيه. وحتى لو طلعوا الإسلاميون فالانتخابات ما كيخلعونيش، اللي كيخلعني هو التطرف فكل الأديان يهودي كان أو إسلامي، حقاش كيدينا للهلاك.
هل أنت متفائلة عما تسير عليه الأمور في المغرب؟ متفائلة وبزاف، غاديين يتقادو الريوس واليوم يمكن نهدرو على الديموقراطية في المغرب، الملك محمد السادس أعطى نفس من الديموقراطية وبفضل الحوار الذي أقامه بدأنا نتكلم بحرية ولكن خاصنا نكملوا وما نوقفوش. للديموقراطية ثمن، وخاصنا نبداو على التربية، راه ماشي بين نهار وليلة غادين نوليو ديموقراطيين. حنا ماشي مستعدين دابا للديموقراطية، ولكن راحنا فالطريق، خاصنا نمشيوا خطوة خطوة باش نتعلموا الحرية والديموقراطية.
هناك مطالب كثيرة قدمت إلى لجنة مراجعة الدستور، ما هي مطالبك كسياسية وكمواطنة؟ خاص الدستور ينص على دسترة اليهودية، بالإشارة إليها كمكون من مكونات الهوية المغربية، حتى وإن كان عددنا قليل فإن ثقافتنا وتقاليدنا جزء لا يتجزأ من الثقافة المغربية، كما يجب الاهتمام بالطائفة اليهودية لأن لها مكانتها ودورها في مسيرة الديموقراطية. إننا جزء من هذه الأمة وسأكون حزينة لو تم قطع هذا الجزء في الدستور الجديد، ففي الاتحاد قوة.
هذا الأمر غائب عن النقاش الدائر بخصوص الدستور، وأنتم كطائفة تتحملون مسؤولية في ذلك لأنكم لا تدافعون عن هذه الفكرة؟ لقد ناضلت وسأناضل في سبيل بلوغ هذا الأمر، في الطائفة اليهودية منطق التعيينات هو القائم، الآن هنا شباب يرغب في دخول الأحزاب السياسية، وهذا أمر إيجابي.
