الحركة الشعبية تلفات ليها الحلوفة: السنتيسي كيقترح تصبغ البوطا الحمراء للفقراء والزرقاء للأغنياء والبرلماني لحموش ورث بلاصتو لبنتو فلجنة المالية والبرلماني المدان فاختلاس اموال عمومية داير فيديو فتكتوك قدام لقجع وعلوي (تصاور)

المعارضة فالبرلمان، مكيهمهاش شنو طاري فالمغرب من مشاكل اجتماعية وبنوية بحال فضيحة 16 مواطن مغربي فقدو البصر فسبيطار 20 غشت فكازا، ولا ديك المرا لي ولدات برا سبيطار سيدي زوين، ولا احتجاجات سكان الحوز. هاد المعارضة نسات هادشي كامل واقترحت اليوم على الحكومة تصبغ البوطا ويتلغا دعم المقاصة.
ادريس السنتيسي رئيس فريق الحركة الشعبية بمجلس النواب، خدا الكلمة أمام أعضاء لجنة المالية وبحضور وزيرة المالية فتاح علوي والوزير المكلف بالميزانية فوزي لقجع، وقال بلي خاص نديرو جوج بوطات واحدة للفقراء تصبغ باللون الأحمر والثانية للأغنياء باللون الازرق.
هاد المقترح خلا كولشي كيضحك وكيتعجب من المستوى لي وصلت ليه المعارضة ديال الحركة الشعبية، واللي اعترفت بلي صوتت على 95 في المائة من مقترحات قوانين جابتها الحكومة. خصوصا وأن هاد الكلام جا فسياق مناقشة مشروع قانون مالية 2024.
ماشي غير هادشي الحركة الشعبية، معندهاش مشكل ف"توريث المناصب" بحيث علن رئيس لجنة المالية بلي توصل بمقترح تكون سكينة لحموش بلاصت باها محمد لحموش فمنصب داخل مكتب لجنة المالية.
هاد لحموش دافعين بها بزاف فالحركة، هي البرلمانية لي معروفة بمولات "الكلب" لي تجلا فالسويسي، وهي نفس البرلمانية لي بينها وبين السياسية غير الخير والاحسان، مكتعرفش تهضر ولا تصرح للصحافة من غير داكشي لي كيكتبو ليها.
من جهة أخرى، واحد البرلماني بغا يولي مؤثر بزز وديما كينشر لايفات وفيديوهات ف تكتوك، لي هو عبد النبي عيدودي من الحركة الشعبية، دار فيديو اثناء بداية مناقشة مشروع الميزانية فلجنة المالية، قدام لقجع وعلوي واعضاء اللجنة ورؤساء الفرق.