حصري.. الخطاط ينجا ضربو تران وما غاديش ياخد عضوية اللجنة التنفيذية لحزب الاستقلال وصحابو خواو به

Ellouali.zaz.1987@gmail.com
كشفات مصادر حزبية على إطلاع ل"گود"، أن الخطاط ينجا رئيس جهة الداخلة وادي الذهب، ما غاديش ياخد عضوية اللجنة التنفيذية لحزب الاستقلال.
وحسب مصادر "گود" فقد انتهت قبل قليل من عصر يومه الأحد الموافق لتاريخ 14 أبريل المناقشات على مستوى اللجنة التنفيذية لحزب الاستقلال واللي تسالات برفض تعديل الشرط المتعلق بشغل ولايتين كاملتين بالمجلس الوطني لحزب "الميزان" من أجل الحصول على عضوية اللجنة التنفيذية للحزب.
مصادر "گود" أكدات أن الاجتماع ديال اللجنة التنفيذية لحزب الاستقلال كان فيه نقاش كبير حول تعديل هاد النقطة واللي الغرض منو هو التمهيد باش يدخل الخطاط ينجا للجنة التنفيذية للحزب، بحيث قاد الأمين العام للحزب نزار بركة محاولات باش يتم التعديل ويتحيد هاد الشرط وهو الشي اللي تم رفضه وحط عليه منسق الجهات الجنوبية الثلاث وعضو اللجنة التنفيذية للحزب مولاي حمدي ولد الرشيد "الڤيتو"، وأكد أن هاد التعديل ما غاديش تم الموافقة عليه وأنه ما غاديش يغير القانون.
مصادر "كود" أكدات أن حلم الخطاط ينجا دابا مشا أدراج الرياح والأمين العام للحزب نزار بركة براسو اقتانع بإستحالة تعديل المادة اللي كان عليها خلاف، وأنه اقتانع بالتبريرات اللي قدم ولد الرشيد والتيار ديالو.
ومن جانب آخر، قالت مصادر "گود" أن فريق الداخلة اللي حضر أشغال المجلس الوطني غادروا بمجرد توصلهم بمعطى استحالة دخول الخطاط ينجا للجنة التنفيذية للحزب.