أغراف ندونيت إيخصات أغاراس.. تنظيم بحال مونديال 2030 خاصو المعقول والجدية اللي دوا عليها سيدنا

نحسبو 2024 سالات وبالتالي غادي نلقاو بلادنا في عام 2030 كتحتضن أكبر تظاهرة كروية عالمية بشراكة مع البرطقيز والصبليون.
تنظيم بحال هاذ التظاهرة بحال ما جا فالعنوان خاصو المعقول والجدية اللي دوا عليها سيدنا مؤخرا فواحد الخطاب.
مزيان يتم التوجاد لهاذ العرس على تيساع، وكان اختيار لافي ايكو فمحلو في اللقاء اللي نظماتو عشية الخميس فكازا حول "كازا وأفق 2030′′، على الأقل باش نفيقو من الأحلام ونشمروعلى الكتاف والعقول باش تكون بلادنا في الموعد، لأنو كيفما كيقول المثل "عرس ليلة تدبيرو عام"، وكأس العالم ماشي عرس عادي خاصو فقط غير تريتور والدقايقية و طهور ورقصة عبد المغيث.
اللي كيطمئن فكازا هو هذاك التفاهم الكبير بين رئيس الجهة والعمدة وحتى الوالي مهيدية اللي ساهم فتغيير معالم الشمال وبدا التغيير فالرباط قبل ما يكمل اليعقوبي الأوراش على حقها وطريقها، لكن التفاهم واقتسام الرؤية بوحدهوم ما كافيينش. ضروري ضمان التقائية السياسات العمومية والتنسيق بين كل الجهات اللي غادية تعرف احتضان مقابلات كأس العالم.
أكيد عندنا واحد المكسب كبير كيتجلي في الأمن وبوليسنا ديما بريكاد وفي قدرة الداخلية والسلطات الترابية على ضبط كل الأمور بالمليمتر والبق ما يزهق، لكن خاص باقي القطاعات تكون حاضرة ناظرة، حيث ماشي بالضروري غادي يكتفيوعشاق الكرة من كل البلدان بالملاعب فقط، الكثير منهم عندورغبة يشوف جهات أخرى ويتعرف على المغاربة وعاداتهم وتقاليدهم وأسواقهم.
فلقاء لافي إيكو تطرح سؤال مهم جدا على الطواليطاتالعمومية اللي تقريبا ما كايناش في مدن المغرب، وكتخلي اللي مزير يقلب على شي قهوة باش يترخف، وفي غالب الأحيان كيكون الساروت عند السرباي، وخاصك تكونصومي باش تخوي المزيودة.
خاصنا كذلك نأهلو السبيطارات والقهاوي ولوطيلات ونراجعوأثمان كل المشروبات ونصلحوا قطاع النقل وخاصة الطاكسيات الصغيرة ونحلو مشكل التطبيقات ونقضيو على البراكاج ديال ماليها من طرف صحاب الطاكسيات، علما أن الكوار مولفين إيبير وإيندريف.
شنو وجدنا فيما يخص علامات التشوير اللي خاصها تكون بلغات عديدة من بينها الأمازيغية. شلا حوايج كتتطلب جيش ديال المفكرين وناس اللي عندهوم تجربة في تنظيم التظاهرات العالمية الكبيرة.
في الأخير، واللي هو مهم وأساسي، هو تحسيس وتوعية الشعب وضمان مشاركتو في نجاح كأس العالم، وهاذشيمشروط بتحسين أوضاعو المعيشية قبل 2030.
القضية راه ما ساهلاش وما كتطلبش غير تصريحات بحال ديال مول بناء الملاعب اللي هاز هم الافتتاح والاختتام ، بغاتأغاراس أغاراس، واللي قال العرس ساهل يسقي ليه غير الما.
من هنا ل2030 تدوزو بخير.