ماكاينش حل ثالث. علاش غادي نخلي برهوش ديال الخلا يتفلى عليا بحال إيلى أنا ماعارفش شنو هيا صحافة فرنسا؟؟؟ ماشي عيب مللي تجي من ناس مثقفين ومنفتحين جدا على الثقافة والصحافة الفرنسيتين؟ بحال التازي وعبد المومني واقصبي

عبد اللطيف اكنوش استاذ باحث جامعة الحسن الاول سطات //
الحرب جايا، وبدات بعدا ما بين صحفيين من فرانس3 وشخصيات مدنية مغربية حول البرنامج المتعلق بسيدنا، وللي غادي القناة تدووزو في 26 ماي المقبل…
الشخصيات المغربية الثلاثة هوما السادة فؤاد عبد المومني، ونجيب أقصبي وكريم التازي، وهوما كاينتاميو للمجتمع المدني…والصحافي ديال فرانس3، هو السيد جان لويس بيريس…
السيد الصحافي جا لعند هاذ الناس في شهر فبراير 2015، وقال ليهم راه القناة كاتوججد واحد الروبورطاج على "اقتصاديات بلدان المغرب الكبير" بثلاثة، أي تونس والجزائر والمغرب…
الصحافي طلب من خوتنا يهضرو ليه على الدور للي كاتلعبو "المقاولات للي هيا في ملكية العائلة الملكية في الاقتصاد الوطني المغربي"…المسألة كاتبان طبيعية بحكم أن السادة بثلاثة عندهوم "رأي نقدي" فيما يخص الاقتصاد ديال البلاد، وهاذا من حقهوم، وماعند حتى واحد ما يقول فيه…شخصيا كانقبلو، وندافع على رأيهوم، واخا نكون ماكانتقاسموش معاهوم…
السيد الصحافي خلا خوتنا في دار غفلون حتى لهاذ اليام، عاد طلع فيها بخبر أن القناة ديالو برمجات روبورطاج خاص بما أسمته "الثروة والأعمال الاقتصادية ديال ملك المغرب"…هوما ما سكتوش ليه، وطلعو بواحد البيان كايشرح "الخدعة ديال السيد"، وكايأككدو أنهوم، واخا ما كاينكروش كلامهوم، راهم ما كاينخارطوش في "الخط التحريري" ديال السي "بيريس" والقناة ديالو…
صحيح أن بين الموضوعين مسيرة عام…وخوتنا عندهوم الحق يتقللقو على هاذ الصحافي الزوين…
جبت هاذ الخبر غير باش نقول: راها هاذي في الحقيقة ماشي "خدعة صحفية"، راها طريقة ديال العمل للي هيا من صلب العمل الصحفي خاصة مللي كايتعلق الأمر بالمغرب…وخوتنا بثلاثة خاصهوم يكونو عارفين مزيان هاذ الباكور…
علاش غادي نخلي برهوش ديال الخلا يتفلى عليا بحال إيلى أنا ماعارفش شنو هيا صحافة فرنسا؟؟؟ ماشي عيب مللي تجي من ناس مثقفين ومنفتحين جدا على الثقافة والصحافة الفرنسيتين؟؟
والله يا بوه ما ندوي معاه حتى نعرف بالضبط فين غادي، وعلاش كايقللب، وآشنو هو "الخط التحريري" للي غادي فيه، وفين باغي يوصل…ديك الساعة ندوي على راحتي، ونتحمل مسؤوليتي، ولا نجري على بوه…ماكاينش حل ثالث على ماكانعتاقد…