"كود" تنفرد بنشر حلقات محمد سقراط في السجن/ الحلقة 20/ بغيت نطول المحاكمة باش نشد بلاصة زوينة فالشمبر ملي نتحكم، ولكن المحامي لي غيطول الجلسة طلب من القاضي يعدمني يلا بغا

حاليا مرتاح فبلاصتي وبيخير, ولكن الى تحكمت دابا غادي نتحول للشامبر آخر ديال المحكومين, وتما غادي يبدى الحبس الحقيقي, حيث نسبة الإكتظاظ كبيرة وخاص تسنى لأكثر من شهرين حتى لقرابة تلاتة أشهر ونتا فالأرض عاد تشد لبلاصة, لذا نصحني إبراهيم أنني نقول للمحامي يبقى يردني مداولة شي خمسة ديال المرات أو ستة, عاد نتحكم ديك الساعة, ملي غادي نمشي لشامبر آخر غادي منتعطلش بزاف باش نشد لبلاصة حيث رقم الإعتقال ديالي غادي يكون قدام .وداكشي لي درت, دورت للطاهر و قتليه يبقى يردني مداولة, وواش ممكن هاد الأمر, قاليا قانونيا ممكن, غادي تبقى تمشي للمحكمة وحنا ندفعوا إنابة ديال محامي جديد, ونطلبوا مهلة لإعداد ملف الدفاع, وهاكة راه نردوك مداولة شحال ما بغيتي راه كاين عرام ديال المحاميين كينوبوا عليك .
جا نهار لخميس الرابع عشر من شهر يونيو حيث تكشر شمس مراكش عن أنيابها, وتحول المدينة الى قطعة من الجحيم , وصلنا للمحكمة بحال لكلاب عرقانين وسخفانين, كون كانو كيجيبونا فالكاميوات ديال لبهايم كون حسن من داك الصندوق الحديدي لي كيجيبونا فيه.
دخلت للقاعة كانت ممتلئة عن آخرها ,رفع أصدقائي من المناضلين وغير المناضلين شارة النصر رديت عليهم بمثلها, ورفعوا شعارات شي جوج مرات أو تلاتة معقلتش عليها, مما خلق بلبلة فالمحكمة أتاحت لي التطلع الى وجه خديجة الى عينيها, وأن أبتسم لها أن أقول لها بعيني أنني فرحان حيت شتها , كان العديد من أصدقائي لي كنعرفم ولي مكنعرفهمش فالمحكمة, والعديد من المحاميين , تقدم الطاهر أبو زيد ( كيتقلق ملي كنعيطليه الطاهر قاليك سميتو طاهير واش أعباد الله واحد سباعي قد البغل عتعيطليه طاهير .. نعيطليه سوسن حسن) وقدم إنابة للعديد من المحاميين وطلب مهلة لإعداد ملف الدفاع , رفضها القاضي وقاليك راه هادي غي قضية ديال تجارة المخدرات آش باغين تردوها نتومة و السيد ساني على المحضر وعند وكيل الملك, نبداو المحاكمة دابا, طلبوا أنهم يقدموا الدفوع الشكلية, ويأجلوا المرافعات حتى الأسبوع المقبل, ورفض القاضي علما أنه من حقهم قانونيا, غي هو وكان القاضي مكان باغي فريع الكر, وكان باغي يحكم عليا دغية ويتفك مني, ويتهنى من سماع شعارات المناضلين فالمحكمة.
كنت عارف مسبقا شحال غادي ناخد ديال الحبس, إلا في حالة حصول المعجزة وأقتنع القاضي ببرائتي, وهذا ما لم يحصل , كانت محاكمة مطولة , عيت فيها بالوقوف لأكثر من ساعة, وضرني عنقي بقوة مكنبغي ندورو باش نشوف خديجة وكيردني البوليسي لي من ورايا , بقيت كنقول مع خاطري العامين غادي نشدها نشدها, يالله طلقونا للفراجة وخليوني نمشي نرجع لباياصي راه عيت, لكن محاميي الأشاوس الله يسمحليهم, أطالوا في إستعراض معرفتهم القانونية وحفظهم للفصول, وتعداد مناقبي كمناضل لا يشق له غبار ساهم فتعديل دستور لبلاد كاع, وأطالوا من مرافعاتهم بحال الى أنا هو نيلسون مانديلا, أو الثوري الشهير أسامة الخليفي, فواحد اللقيطة سولني القاضي:
_ آشنو كتقول فهاد الإتهام؟
وأنا بكل غرور النصف إله الذي أحمله ضحكت فوجهوو قتليه:_ واش باينة فيا كنبيع لحشيش .
ديك الساعة كعا بالمعقول ومابقاش حاملني, وبدا كيغوت:
_ حنا راه فمحكمة, هادي ماشي بلاصة الضحك, نسولك جاوبني وبلا متضحك .
_ كنعتاذر سعادة القاضي .
أعاد علي السؤال, أجبته بالنفي, بعدها قدم عبد الإله تاشفين مرافعته الشهيرة التي أنهاها بالغوات مع القاضي حيث بغا يقمعو, وقاليهم حرفيا أنا أنسحب من هذه المحاكمة وهاهو بين أيديكم أعدموه ...
أنا ديك الساعة ملي سمعت أعدموه غلباتني الضحكة كنشوف فالطاهر كنلقاه حتى هو باغي يضحك, قتليه ملي وقف حدايا بشوية: الله أخويا أعدموه كاع ..... قمعني البوليسي ششششششش شوف قدامك.
بعد عدة مرافعات قرر القاضي أنهاء مهرجان التفذلك والتحدلق القانوني ذاك, وأنهى الجلسة , هنا فمراكش مكتسمعش الحكم فالمحكمة كيسمعوه غي المحاميين أو عائلتك الى بقاوتما, أما نتا حتى كتمشي للحبس عاد كتدور فالتيليفون, والى معندك حد ومقطوع من شجرة كتسنى يومين أو أكثر, حتى كتجي ورقة الحكم باش تسني عليها تما كتعرف شحال عطاوك, وزايدون بلا متكرفص راسك فالتخمام كاين العلماء فالحبس غي قوليهم المونتيف وقوليهم واش عاطي شي فلوس أو لا, وإينا قاضي كتدوز عندو فالجلسة, وإينا محامي داير, ويعطيوك شحال غادي تشد .
ملي رجعت للحبس بقيت كنبيض بيضة هنا وبيضة لهيه أنا كنت عارف آش كاين, ولكن قلت مع راسي ربما تكون مرافعات المحامين عطات أكلها, ولكن للأسف نجحوا فقط في اطالة مدة وقوفي في المحكمة ,ملي دورت للطاهر قاليا:
_ عامين أصديقي عامين .