قالك شوف تشوف , هيه

واحد السيد عندنا في المغرب ماعندو الوجه علاش يحشم , مخبي النهار كامل ورا النظاظر الكحلين كثر من قلبو . كيصحاب راسو راه هو رومبو ديال الصحافة في المغرب , الضحكة الصفرة ديالو الى طلقها مايوقفها لا صباح لا مساء . كيعجبني عا بشوف تشوف وهو ماشايف والو.
قالك راه معارض ديال المخزن وهو أكبر خوايضي يلحس النعالة . ولاكن بداو خوتنا كيعيقو بيه . كل نهار كيهرس لينا روسنا , وصلني ايميل من الميريكان وصلني ميساج من درية من الهندوراس , كتبات ليا عمة كوادلوبي .
نهار حكمو عليه باش يخلص الغرامة ديال الكدوب والتشلهبيت ديالو كل النهار وهو يبكي , وهو قاتل الميت ويبكي في جنازتو , كاعما قالينا بعدا فين وصلات ديك الدعوى ديال المحكمة , شناه عا جمع الفلوس وضربها بطمة .
بغيناه عا يقول لينا كيفاش خلاه المخزن يخرج من الجنب ويدير بلاصتو و اش بغا يقول لينا زعما , أنه وعر من المخزن وقاري حسن منهم . واش كيصحابنا كوانب ولا بوزبال .
الهضرة ديال الحمام ليكايقول كاتقول جدتي حسن منها , كيعجبك عا بالأرقام ديال الجريدة ليكايبيع ليفاضحنا بيها , ديما فاضحنا انا كنبيع كثر , وأنا هو بوها . واش ماعرفش بيلا مجلات البورنو في العالم هو ليكايبيع كثر , واش ماعرفش أن الصحافة الصفراء هي ليكتبيع أكثر ؟؟؟ ولكن نعدروه مسكين , راه ماقاري والو في الصحافة . واش ماعرفش مثلا عدد ليقراو ركن من القلب إلى القلب يكون كثر من ليقراو تخربيق ديالو من نهار حل عينو وزيدوه لهاد الحرفة.
راه الا كنتي كتبيع بزاف ماكيعنيش انك واعر وكتغير في البلاد , راه كيعني أنك داير السلعة ليكتمشي في السوق , وغادي وطوح فيها . راه كيعني أنك كتجري ماشي عا الى المبادئ راك كتجري عا على عشاك وطرف ديال الخبز . راه النضال والفكر والادب ماشي هما شحال كتبيع , را الجرائد الواعرة ديال العالم كتكون محدودة النسخ لأنه ماكيفهمها ويقبلها غير النخبة وكتكون صعيبة ماشي بحال الجوج حروفة ديال القهاوي.
بغينا عا نعرفو آش من جهة معاها هو , ولا عا مع الرابحة ؟ مرة يدافع على الملك و ورباعتو ويسب في الصحافيين , مرة مع الإسلاميين والعدالة والتنمية , مرة مع الماجدي , مرة مع مدراء الأبناك ومرة ضدهم , مرة مع الهمة , كايبان ليا ما هامو تا حاجة في الحقيقة غير جيبو , واحد النهار بلا حشمة بلا حيا قاليك الصحافة خاصها دير ليها الحكومة قوانين وتمنع الجرائد الجديدة , باش مايجيش للصحافة من والا , وماشافش راسو هو منين دخل للصحافة.
واش هدا ليمسيفطاه جمعية لمؤتمر لاسبانيا بعدما كان شومور حارك تما , يعول عليه بنادم .بغيت عا نسولو واش حرك قبل من بداية المؤتمر ولا منين سالا . وخونا راه عارف الجواب مزيان . هادا را يخوي بيك من الأول , وكيما كيكولو لي ف راس الجمل ف راس الجمالا.
كيقول ليك حرية التعبير وهو أكبر عنصري وكيقمع الأفكار ليضدو والطبقة العاملة . وها وجهي ها وجهو . ماعجباه تا حاجة في الدنيا غير راسو , كل عمود كيكتبو كيصحاب ليه راسو غابريال غارسيا ماركيز , وهو بحال الدبانة كاع النهار وهي تزنزن بلا فائدة . وباش كايسالي معايا مزيان هو الكدوب والغميق ديالو , والله كيصحابنا بوزبال بصح . ولكن هو ليجات معاه شاري الديور في خارج المغرب ويحسب في الريالات , مابقا راضي يريح حتى يريح مع ولاد الدرب ليكانو كيقراو حسن منو وكان كيحلم عا يهضرو معاه.
قالو الاولين شوف تشوف و مع هادا الى سمعتي مرة أخرى شوف تشوف وعا قول نيني يا مومو تايطيب عشانا , بدلنا البلاد بكري . راه يبدل جلدو بزربة ولكن تبدال البلاد بزاف عليه.
الحمارة مشاية والزمان يدور , ما زال غادي نوقفو كاملين قدام التاريخ ويبان الحق ويبان الباطل . واش نقوليك جمع لفلوس دابا كيفما بغيتي وكدب على الناس وقتما بغيتي ولكن إلى طفرتيه في حياتك ها وجهي ها وجهك.
را عا حشمنا , وما لي في القلة راه يطلي مدينة كثر من الواد الحار , واحشم وخلينا ساكتين.