محمد بنعيسى يضيف اتحاد كتاب المغرب إلى إمارته في أصيلة: اللي جبد موسم الولي الصالح بنعيسى يخرجو ليه لجواد بحال عبد الرحيم العلام

نهار كتبت على مهرجان أصيلة وعلى بنعيسى، مكنتش كنتوقع هاد الكم الهائل من الصوحافيين، والفايسبوكيين، غادي ينتاقدوني ويسبوني وينبريو للدفاع عن رمز الثقافة فالمغرب(في حالة وجودها اصلا).

لقيت راسي بحال الا نتاقدت زعيم شي مافيا مقاودة، خرجوا ليا شي وحدين من للغيران، واقيلة كان ساد عليهم وكيخرجهم غي لمثل هاد المناسبات، أنا الصراحة كتبت بحسن نية، وكتبت ما عايشته فأصيلة ومايعايشه بعض أبناء تلك المدينة، ما دفعني تاواحد ما حرضني تاواحد واخا الصراحة أنا مكرهتش، ومكرهتش حتى أنا ندخل فهاد الحروب الكلامية المدفوعة الأجر، نعاون بيها الوقت شوية.

من بعد بقيت كنستفسر على نفوذ سي بنعيسى فين واصل وشكون هادو لي بداو عليا بالسبان مخلاوش فيا، بقيت غادي غادي حتى وصلت لإتحاد كتاب الموغريب، أييه إتحاد كتاب الموغريب لي على رأسه حاليا عبد الرحيم العلام.

هاد الشخص لي عمرنا عرفناه أو سمعنا بيه، سولت صاحبي معايا فالدار قالي عمري سمعت بيه حتى نهار طلع فالإنتخابات ديال اتحاد الكتاب،(هاد صاحبي كاتب وسيناريست معروف)، سولت سام القط ديالي قالي بالعمى الى عمري سمعت بيه، درت استطلاع رأي فالفايسبوك وسط 14 ألف كونطاكط لي عندي، 5000 فالصفحة الشخصية و3000 ديال الفولورز، وربعالاف والصرف فالباج ديالي، هادو كلهم سولتهم وتاواحد معرفو، شي وحدين منهم دارو جيم وزادو علاش ما نعرف، ياحسرة أنا راه جامع كم لا بأس به من الموثقفين والمخرجين والسوليمائيين والكتاب أما الشعراء والصوحافيين هادوك عندي مابغاهم الكلب، وتاواحد فيهم ماقال كيعرفو.

يا للمأساة.. يا للفجيعة...هاد السيد هو رئيس اتحاد كتاب المغرب، رئيس على الكتاب لكبار بحالي وبحال موحماد مول الحانوت ، ومنين جا هاد السيد حتى تربع على أكبر هيئة للموثقفين والمبدعين لمغاربة، جا طبعا من جبة سي بنعيسى بعد أن أضاف الشأن الثقافي الى إمارته، وبذلك حتى إتحاد كتاب المغرب أصبح تابع لإمارة أصيلة، لدرجة أصبح كاتب الرائعة النقدية:كينونة النص الروائي. قضايا السارد في لعبة النسيان( غي من العنوان يبان العربون).

هاد الشخص خدام مع بنعيسى فداك لعجب ديال أصيلة، هو لي شاد قاليك التواصل مع العلماء لي كيجيو من مشارق الأرض ومغاربها، وطبعا السيد مكيمشيش بوحدو بل كيمشي مجموع فباك واحد هو ومرتو لي حتى هي مسؤولة على ورشة أدب الطفل، وان شاء الله حتى وليداتهم الصغار الى قلبنا نلقاوهم مسؤولين فشي قنت، من نهار تنصب العالم سي عبد الرحيم على رأس اتحاد كتاب المغرب وهو غادي جاي رفقة حرمه ومرة لوحدو ومرة حرمه لوحدها بلا محرم للخليج، بحال الى كيقلب على هينري ميلر مغربي تالف تما.

والحمد لله مع كَوكَل يكفي لتسأل كي يجيبك، درت "اكرام عبدي الخليج" فكوكل، وهو يطلع ليا شي عجب بحال: إكرام عبدي تبحر في ذات الأنثى، ومن بعد صورة كتدوي فيها على نظرة الخليج للمغربيات، وقاتليك في إطار زياراتي الثقافية للخليج، أواه علاه الخليج كيديروليه الناس زيارات ثقافية؟ يديرو زيارة دينية لقبر سيد النبي واخا، زيارة ثقافية لجامعة السوربون واخا، زيارة لمعهد العالم العربي فباريز، زيارة ثقافية لمكتبة الكونغريس الأمريكي أكبر مكتبة فالعالم، زيارة ثقافية لمكتبة مدبولي فمصر، زيارة ثقافية لخنيفرة، أما زيارة ثقافية للفنادق الفاخرة فالخليج هادي متدخلش للعقل.

بحال هاد الكوبل كاين منو كثار مزروعين فالمشهد الثقافي والإبداعي فالمغرب كيحميوهم ديناصورات وأمراء إقطاعيين من العهد القديم، مازال لحد الآن يدهم طويلة وممدودة، وكنظن أن على العهد الجديد تخليصنا وتحريرنا من هذه الطغمة الفاسدة، حيث راهم راجعين بينا اللور ومهما بدل سيدنا من جهود باش يزيد بينا القدام فشتى المجالات فهادو كيعرقلوا مسيرة التقدم المولوية، ياك قاليك سيدنا راه باغي ينهض بالإقتصاد اللامادي، اذن قبل أي شيئ عليه أن يرفع أيدي هؤلاء عنه.



ملحوظة: الا شي واحد غادي يعطي شي امتياز لشي واحد آخر باش يسبني، المرجو من داك الواحد الأول يعطيني غي النص من داكشي لي غادي يعطي لهاداك الواحد التاني وأنا نسب راسي سبان حقيقي وبالأنواع عوض سبان الديوثيين لي توجه ليا مؤخرا.