محمد ساجيد يتحدى محمد السادس. استقبله فكازا بشوارع موسخة وروائح كريهة ب"نفايات واوساخ تلوث بياضها وتشوه سمعتها / 2 فيديو والبوم صور للمدينة هذا الصباح

كازا مازال موسخة وخانزة وبهاد الطريقة استقبل عمدة الدار البيضاء محمد ساجيد رئيس الدولة الملك محمد السادس اليوم الاربعاء. ففي جولة صباحية ل"كود" باهم شوارع كازا لوحظ ان الخنز والزبل مازال "يزين" الشوارع. من الزرقطوني للروداني ودوز على انفا ورجع من المسيرة الخضراء. اكوام ازبال وحتى البركاسات اللي جابهم مجلس المدينة من سويسرا زادو وسخو المدنة "دابا هاد المجلس جاب بركاسات من سويسرا وما عارفش باللي اللي كيخرج الزبل راهم هما الدراري الصغار ولعيالات وما كالوش لهاد الفئة من البيضاويين كيفاش كتفتح وكيفاش نديرو الزبل. هادي بوحدها تبين ان المنتخبين ماشي كازاوا اللي انتاخبوهم يمكن شي حد خر" يقول مصدر من مجلس المدينة ل"كود"
الشركة اللي كتجمع الزبل فكازا غادية تاخذ 64 مليار فالسنة من مجلس المدينة ولكن كل نهار الزبل اكثر من اللي فات.
تحدي ساجيد محمد لمحمد السادس يظهر في هذه النقطة بالضبط فقد سبق للملك ان خطب في البرلمان واثار نقطة الازبال وقال ان الدار البيضاء مدينة "النفايات والاوساخ التي تلوث بياضها وتشوه سمعتها". دابا شحال من شهر دار على الخطاب وهاد التشويه تضاعف ولخنز تزاد وساجيد مازال هو ساجيد ما مسوقش، حتى عرفو الملك جاي عاد دارو لقاء ليلة امس مع الوالي سفير حسب ما علمته "كود".