كرانس مونتانا. انتصار سياسي ديبلوماسي باهر وفضائح تنظيمية كبيرة وصفقات بدون مناقصات: شي جابو ليهم طيارة خاصة ب20 مليون وديبلوماسيين تسخسخو بزاف

انتهى منتدى "كرانس مونتانا" بالداخلة السبت الماضي ومعه اسدل الستار على حدث غير مسبوق في واحدة من اجل مدن المغرب: الداخلة. استثنائية هذا الحدث جاءت من كونه استقطب للمنطقة ممثلا ل115 دولة وشخصيات كبيرة منها رئيس دولة مقدونيا ووزاء اولين لعدد من الدول ووزاء سابقين منهم الوزير الاول السابق لاسبانيا خوسي لويس ثاباتيرو…… اختتم المنتدى بنصر ديبلوماسي كبير جدا للمغرب. نصر سياسي دييلوماسي رغم كل محاولات البوليساريو ومعها الجزائر عرقلة تنظيم هذا المنتدى.
حضور الامم المتحدة ودول من اكثر المساندين للبوليساريو كجنوب افريقيا وغانا وكينيا زاد من حدة غضب الجزائر وجبهة البوليساريو. هاد الشي كتبات عليه "كود" لاكثر من مرة. لكن واش ما كانش بامكان المغرب ينجح تنظيميا بنفس النجاح الديبلوماسي فهاد المنتدى؟
"كانت الامور واقفة راه كون ما كانوش لمغاربة كون ما دار واحد" يقول مصدر ل"كود". ناس كرانس مونتانا اللي من سويسرا وعايشين فموناكو جاو يتبنضضو وصافي. "دابا نهار خدا المنتدى الرعاية السامية المغرب قرر ينجحو" يضيف مصدر "كود". لكن هاد النجاح كان ضد الحكامة الجيدة والشفافية احيانا لان صفقات المنتدى اللي خداوها لمغاربة ما دارش ليها طلبات عروض. "ما كانش الوقت بزاف" يرد مصدر ل"كود". رد غير مقنع.
هكذا ظهرت شركات سواء مكلفة بالاستقبال او بالعلاقات مع الصحافة او المبيت …..
لكن المشكل الكبير كان هو التنظيم٬ فتولي وزارة الداخلية من خلال الحضور الفعلي لوزير الداخلية محمد حصاد جعل الحدث ينظم لكن بهفوات وفضائح تنظيمية
ديبلوماسيون لقاو ريوسهم مشاركين الخيمات
التقت "كود" طيلة ايام المنتدى بعدد من الديبلوماسيين والديبلوماسيات اشتكوا اولا من اختيار المنظمين لخيام "الريح لكبيرة ما كتخليناش نعسو وكاين البرد. بالصراحة تكرفصنا بزاف" تحكي ديبلوماسية من اوربية ل"كود". ماشي غير هاد الشي "كاين اللي لقى راسو كيتقتسم الخيمة ديالو مع ديبلوماسية اخرى" تشرح اخرى من شمال اوربا. الحضور الكبير لحوالي 800 مشارك منهم 600 اجنبي جعل المنظمون في البداية يختارون اكادير لنقل المشاركين لكن في النهاية تم نقل عدد في حدود 200 فقط فيما ظل اخرون في المدينة فوقع الارتباك.
ما زاد من حدة غضب بعض الديبلوماسيين المشاركين هو انهم لم يجدوا المخاطب المناسب "صحاب البروتوكول فالخارجية تهمشوهم المنظمين اللي هما فوزارة الداخلية. صحاب الداخلية بغاو يديرو كلشي واحتاقرو الموظفين ديالنا فالخارجية" يشرح مصدر ل"كود". قبل ان يضيف المصدر ل"كود" "المسؤول الوحيد فالداخلية اللي عاوننا هو الوالي خالد الزروالي. كان يدخل كل مرة يطفي شي عافية تقدر تشعل بيناتنا". يبدو ان هذا الوالي العارف للعقلية الصحراوية بحكم انتمائه اليها قد اطفأ اكثر من حريق.
زايدين فيه امن بلا قياس والبوليس والجادارمية تكرفصو
"ما فهمتش علاش هاد الاستتفار الامني لكبير. باش دخلت وكلشي كيقلب. اللي حضر لهاد الشي غادي يحس باللي الوضع الامني فشي شكل وهاد الشي كيخدم البوليساريو" يحكي احد المشاركين ل"كود". كان عدد الباراجات كبير بل ان الطريق الرئيسية المؤدية الى الداخلة كانت اغلقت قبيل افتتاح المنتدى قبل ان تفتح. كان التشدد الامني الكبير عانى منه بالدرجة الاولى رجال الامن البسطاء والجدارمية الصغار. خدمو بزاف الوقت. قبل ما يبدا المنتدى كانوا تعرضوا لتسمم جماعي "لا ماكلة ولا سكنى وكلشي خدم بزاف بزاف" يحكي احدهم. ويوم الافتتاح منع برلماني من الجهة من الدخول بسيارته لان البوليس اللي كان تماك "ما كيعرفوش حقاش ماشي كلهم ساكنين هنا".
صحافيون قلال جابوهم فطيارة مكرية ب20 مليون وشي وحدين ما كتبو والو وعاشو حياة الملوك
من فضائح تنظيم هذا المنتدى هو ان الاشراف على الصحافيين لم تقم به جهة واحدة: الداخلية تكلفات بشي والخارجية بشي وبعض الديبلوماسيين بشي. صحافيون جابوهم فطائرة خاصة فيها بيت النعاس ورجعوهم فنفس الليلة. ثمن كراء هذه الطائرة حسب مصدر "كود" قد يصل الى عشرين مليون. الطائرة كانت للوفد الليبي ولكن بعد تأجل جولة المفاوضات جيء بهم الى الداخلة. هناك صحافيون اخرون تمت دعوتهم الى المنتدى وما عمرهم دخلوا لقصر المؤتمرات. شي جاب معاه ناس وطبعا كلشي على حساب المملكة. لكن حالة مدعو من فرنسا كانت مثيرة للاستفزاز. جابوه من فرنسا وتأخرات عليه الطائرة وكان خاصو يبقى فكازا 8 سوايع. داوه فليموزين حتى لحياة ريجنسي وتمتع فالشراب والحمام والماساج كلشي دارو وداوه للمطار ووصل للداخلة. طبعا ما كتب ما والو. رحلة استجمام على ظهرالدولة.
الضريس ما بانش وحصاد حضر
هيمنة الداخلية على تنظيم المنتدى لا تعني ان كل كبار مسؤولي الداخلية كانوا حاضرين. الشرقي الضريس الوزير المنتدب في الداخلية لم يظهر في حين كان محمد حصاد حاضر بزاف. البعض ربط المشاكل التنظيمية بهذا الغياب. في المنتدى العالمي لحقوق الانسان بمراكش كان التنظيم اكثر حرفية من "كرانس مونتانا" وكانت لمسة الشرقي الضريس حاضرة حينها.
من الوزراء اللي ما بانوش هو وزير الاتصال الذي حضر افتتاح المنتدى مع بنكيران وعا الى الرباط. في هذا المنتدى كان منطقيا حضور الخلفي.
كبار الضيوف استغلوهم على حساب المدينة
من المفروض في منتدى عالمي ان يتم اعداد جولة لكبار الضيوف. لكن ما علمته "كود" ان دوست بلازيي احد مستشاري الامين العام الاممي بان كي مون بالاضافة الى القس الامريكي دجيسي دجاكسون والوزير الاول الاسباني سابقا ثاباتيرو واخرون نقلوا الى فندق بمدخل الداخلة. دابا هاد الناس جابوهم يشوفو مشروع ديال واحد ما مخدم معاه حتى صحراوي من المدينة. كان من المفروض نقل تلك الشخصيات للحديث مع اعيان المدينة ويشربو اتاي او يديهم للمشاريع اللي كتخدم الناس بحال فيرمات الدرهم على بعد 60 كلم عن الداخلة. هادي مشاريع تنموية مفيدة للجميع.
حشومة على لمغرب يبقى يدير منتديات دولية كبيرة بارتجالية وحشومة ياخدو شي ناس صفقات وهما ما فيديهمش.