سقراط عن فاحعة طانطان: شوفو الدناءة والبؤس النضالي فين وصلات: استغلوها ووظفوها سياسيا ضد الحكومة أو ضد وزراء معينين

كيقول واحد المثل مغربي: موالين الميت صبرو، والعزايا كفرو…. وهادشي لي واقع عندنا حاليا فالمواقع الإجتماعية بعد فاجعة طان طان، حالة هيستيرية من البكاء والنحيب والتأسي وطبعا المطالبة بالقصاص من المسؤولين وتحميل المسؤولين السبب فهاد الفاجعة، ومن ورا هادشي كيجي الشوط التاني ديال المازوشية الوطنية، ومكتسمع غي لكل شيئ ثمن في بلدي إلا الإنسان، ومايرادف هاد الموال من الجمل المازوشية كبكائيات الشيعة على مقتل الحسين.
الله من المقدسات ديال لبلاد والأغلبية كيعتاقدوا بأنه كاين، وأن ارضائه هو الهدف من الوجود ديالنا، وكيحكمنا حزب بنى حملته الإنتخابية ومرجعيته على فكرة أنه أقرب لله من الآخرين، والله متجدر فالوعي واللاوعي ديال لمغاربة، ومن بين الدروس لي قراوهالينا فالعبادات فالإبتدائي هي الإيمان بالقدر خيره وشره حلوه ومره، زيد عليها فكرة أن الله يبتلي عباده المؤمنين كما قال في كتابه العزيز: " ونبلوكم بالشر والخير فتنة وإلينا ترجعون" ، هادشي كلو كيعني أنه كون كانوا المغاربة أسوياء فعلاقتهم مع ربهم ودينهم فراه خاص يكونوا كيرضاو بقدر الله، ولكن هوما لا، المغاربة ضد وكالين رمضان وضد المثلية الجنسية ومع الإحتشام ومع مفهوم بنت الناس وولد الناس وضد قدر الله فنفس الوقت، الله بالنسبة ليهم كيوضفوه فوقاش مابغاو، الى شرا طوموبيل كيكتب عليها هذا من فضل ربي، والى قلبها فشي دورة كيبدى يتشكى على البنية التحتية والدولة عامرة شفارة، أما باش يتحمل هو مسؤولية أفعاله كاملة لا، ديما كاين قوى أخرى سواء ميتافيزيقية سواء مادية عندها علاقة بما يصيبه من خير وشر.
فاجعة طان طان وحسب الأغلبية من المغاربة هي مكتابة، ولكن فالواقع كاينة أخطاء بشرية لي سببات فهاد الحادثة الرهيبة، وموت أكثر من 30 طفل هو حقا أمر مفجع بالنسبة لأسرهم والمقربين منهم، ولكن باش تستاغل هاد الحادثة من باب الغيرة على الوطن وتتوظف سياسيا ضد الحكومة أو ضد وزراء معينين فراه هادي هي الفاجعة لكبرى، أن توصل الدنائة بالواحد لدرجة استغلال حادث موت من أجل ضرب خصومه السياسيين، أو يصل البؤس والفقر النضالي بالمنادلين لتحويل ،الفايسبوك وتويتر لحائط مبكى، مكاين غي حداد حداد، وتبدى تسمع الملحون ديال علاش طان طان مافيهاش سبيطار كبير، علاش الواد الواعر مافيهش كانتينة، علاش كلميم مافيهاش حديقة الحيوان، فيناهي الوقاية المدنية فيناهوما الجوندرام، أنا من حقي نعرف حيث أنا كنخلص الضريبة بغيت نعرف فلوسي فين كتمشي، بنادم كيدوي بحال الى هو عثمان بنجلون، 10 فالمية ديال الضريبة لي كيخلصها على بطاطا وماطيشة حتى هي فاضح بيها الدنيا وباغي يشوف المغرب بحال سويسرا، هاد النكديون الجدد، أتباع مدرسة كركسني وللى نقولها لمي، هؤلاء من يريدون تحويل المغرب لمندبة كبيرة، أصحاب لاشيئ يعجبني، مدمنو الفواجع، متصيدوا الحوادث، لممارسة مازوشيتهم النضالية، لإظهار المغرب بصورة سوداء، لاشيئ يحدق فيه يستحق الذكر غير الحوادث، المحتفلون بالجنائز،الراقصون على دماء الآخرين، باغين يحولوا المغرب لحائط مبكى كبير، كل مرة كتلقاهم كيطالبوا بحداد وطني، وإلى بغيتي حداد ديرو نتا بوحدك، كريفي نتا كاع، متحتافل متسهر متشرب متخرج مع صاحبتك أو مرتك متفرج فأفلام شد حق الله وهنينا علاش باغين تفرضوا على دولة على قدها حالة حداد وطني من أجل حادثة سير.
الدراري ماتوا، الله يرحمهم، وكما ذكر فالموروث الشعبي راهم طيور الجنة، سعداتهم، كنتمناو متكررش هاد الحادثة والله ينجي أبناء بلادنا، وحتى الى منجاهمش الله راه لاصورانص كاين، والى كان مزيان فراه كيخفف شوية من ألم الفقدان، بالإظافة إلى أن الرعاية السامية لصاحب الجلالة وتدخلاته في مثل هاد الحالات كتخفف على عائلات الضحايا، أكثر مما تقدر تخفف عليهم صور حداد على الفايسبوك، أو تنكيس الأعلام الوطنية