عيوش ل"كود": رحيل زليخة الناصري خسارة كبيرة بزاف بزاف للمغرب وما عرفتش شكون يقدر يعوض انسانة بحالها اللي كانت تخدم ليل ونهار وكانت اقرب المستشارين للملك

"كانت مولات القلب لكبير والحنان لكثير. كتخدم بلادها وملكها بطريقة ما يمكنش شي حد يتصورها" كهذا علق نور الدين عيوش مالك "شمس" للاعلانات واحد اصدقاء الراحلة على وفاة مستشارة الملك محمد السادس في تصريح ل"كود".
عيوش اكد ل"كود" ان رحيلها "خسارة كبير بزاف عاد" للبلادها ولملكها وللفقراء اللي كانت كدافع عليهم من خلال اشرافها على مؤسسة محمد السادس للاعمال الاجتماعية.
عيوش وصف في تصريحه ل"كود" الراحلة بانها "من الناس لقلال بزاف اللي كيكونو فقلب السلطة وكتحافظ على تواضعها وبساطتها وجديتها وكلشي كيعزها على التواضع اللي فيها وفنفس الوقت على الجدية لكبيرة اللي كتخدم بها".
عيوش اوضح ل"كود" ان الراحلة "ما كان عندها لا عطلة ولا وقت محدد للعمل. كتخدم ليل ونهار وفين ما كان الملك كتسبقو" "كانت تنسى راسها وتقدر ما تاكلهش وحتى دارها بسيطة. اللي كيهمها هو خدمة الملك وخدمة بلادها".
طبعا علاقتها بالملك محمد السادس ماشي بحال باقي المستشارين "كانت اقرب المستشارين اليه كيعزها بزاف بزاف" يحكي عيوش ل"كود".
عيوش اللي كان متآثر بوفاتها قال ل"كود" "ما عرفتش شكون يقدر ياخد بلاصتها ويدير خدمتها ما كنظش شي حد غادي يعوض امرأة مثل الراحلة زليخة الناصري".