وا الباكوري راه "مازن" ماشي مشروع ديالك ولا ديال حزبك راها ديال المغاربة وما عندكش الحق لا انت لا غيرك تختار اللي بغيتي فالصحافة. مسؤولة ل"كود": حنا نفدنا اللي عطاوه لينا

هاد المسؤولين اللي عندنا كيداعيو الديموقراطية والانفتاح ولكن فعقلهم الاقصاء. مصطفي بكوري رئيس مجلس إدارة الوكالة المغربية للطاقة الشمسية "مازن" واللي فنفس الوقت رئيس جهة الدار البيضاء الكبرى والامين العام السابق لحزب الاصالة والمعاصرة عرض اليوم فوارزازات بمنافسة التدشين الملكي ل"نور 1″ اعطاء انطلاقة اشغال انجاز "نور 2″ ونور 3" عرض على صحابو فالصحافة. دار الاقصاء بطريقة متخلفة بزاف. ماشي غير "كود" اللي ما تعرضاتش حتى الموقع الاخباري الاول "هسبريس" ما عرضوهش.
"كود" سولات السيدة اللي تكلفات بالصحافة سناء السميج علاش اعتامدو باش يعرضو كان ردها "حنا نفدنا اللي كالو لينا. عطاونا قاعدة بيانات ديال الصحافيين وعرضنا عليهم".
دابا هادا يمكن اهم مشروع دارو المغرب فهاد السنوات الاخيرة ولا من اهم المشاريع في تاريخ بلادنا كيجي بكوري وكيمارس الانتقائية. عرض على صحابو وصحاب صحابو.
كنكولوها الف مرة "حنا ضد كاع لعراضة. كان خاص طائرة كل صحافي بغى يمشي يخلص التذكرة ديالو ولكن غير يوجدو الطيارة ويعطيو للصحافي المعلومة باش يخدم وما باغينش عراضتك وخليها لصحابك للفرنساويين اللي كتجيبوهم مرة مرة