انتهى مسلسل الاساتذة المتدربين بالتوصل الى اتفاق بين الحكومة وممثلين عنهم مساء امس الاربعاء 13 ابريل. اتفاق طوى كل الخلافات والاشكال الاحتجاجية. هاد الاتفاق فصالح الحكومة وضدها وفصالح الاساتذة وضدهم. فالعمق ما كاين لا رابح ولا خاسر. الحكومة منذ مدة وافقت على توظيف 10 الاف استاذ اللي كيحتجو. ولكن 7 الاف كما نص قانون المالية بخصوص مناصب وزارة التربية والتعليم ل2015 ثم 3 الاف السنة المقبلة 2016 اي في ميزانيتها. كون قبلو الاساتذة هاد الشي منذ مدة كون الملف تحل. لكن دخول احزاب سياسية علي الخط رون كلشي. دابا الاتفاق اللي توقع البارح كيكول غادين يتوظفو دفعة واحدة ولكن ماشي هدا العام بل السنة المقبلة. اي ان من فاوض من الاساتذة كان قليل الذكاء لانه حرم 7 الاف شخص من راتب من يونيو المقبل. دابا كلشي غادي يبدا يتخلص فشهر يناير 2017. الحكومة ما خسراتش فهاد الملف والدولة حافظات على هبتها. حقاش ما طيحاتش المرسومين. وحسب مصدر من رئاسة الحكومة ل"كود" راه كلشي غادي يدوز المباراة بعد الانتهاء من التكوين. الحكومة ماربحاتش غير لفلوس حقاش غادي يبقاو ليها حتى لشهر واحد وتخدمهم٬ بل بقاو المرسومين: اي ان كل واحد من هاد 10 الاف غادي يدوز المباراة قبل التوظيف يعني ما كاينش التوظيف المباشر. وهاد الفيلم هو اللي ناض عليه كلشي الصداع. هاد المباراة واخا شكلية غادية دار. وهي اللي يمكن تحدد وفق مصدر "كود" التعيينات. اي اللي جاب مزيان ياخد لبلاصة اللي بغى يتعين فيها واللي جا اللخر يلوحوه فين كاين الخصاص. فالاخير الاساتذة المتدربين ما طلعوش مفاوضين واعرين.
