ها اللي كيتسنانا ايلى منع القانون اعلانات الرهان واليانصيب اللي جابو الخلفي. جيش من 3 مليون مغربي غادين يوليو مع العصابات والدولة الخاسر الاكبر في كل شيء وحتى دول مثل تركيا ما دارتش اللي دارو هاد لوزير

من الممنوعات في مشروع مدونة الصحافة والنشر اللي صادقت عليه الحكومة الاسبوع الماضي عدم السماح للصحف الالكترونية وطبعا الورقية اعلانات ولو مؤسساتية لكل ما له علاقة بالعاب الرهان واليانصيب. هذا يعني ان كل اعلانات مؤسسة المغربية للالعاب اللي ديال الدولة كلها غادية تمشي لكوكل وفايسبوك ومن بعد ممكن هاد الشركة تختفي.
الخلفي اللي هو ناطق باسم الحكومة كان عليه يحيد هاد الشركة ويهنينا. ياك ديال الدولة وكل عام وغادين تشوفو كتساهم بزاف فدعم الرياضة. المغربية للالعاب والرياضة تملك الدولة 90 بالمائة وصندوق الايداع والتدبير 10 بالمائة احدثت في العام 1962 لتنظيم واستغلال الرهانات الرياضية باسثتناء الخيول والكلاب.
يعني الدولة هي مولاتها وهي المشرفة عليها باش ما يوقعش ادمان وما كيراهنوش القاصرين. هاد الشي كتشرحو المغربية للالعاب والرياضة في مواد اعلامية دابا مع القانون الجديد ما بقاش لشي وسيلة اعلامية تقدر دوزو. بدا الخلفي بالقنوات العمومية وداز للصحف الالكترونية منها والورقية.
حسب مصدر من المغربية للالعاب ل"كود" فان هذا القانون له اثار خطيرة للغاية٬ اذ سيكون له اثر على الامن العام وعلى الصحة العامة بالاضافة الى دعم الرياضة الوطنية، سيتيح للمافيات التحكم في هذا القطاع. هناك احصائيات خطيرة ف80 بالمائة من الرهانات في العالم مصدرها شبكات غير قانونية وسيصبح اللاعبون المغاربة مدمنون وسيتعاطى لها القاصرون. اقتصاديا فما بين 2010 و2014 حولت المغربية للالعاب والرياضة 877 مليون درهم لخزينة الدولة عبر الصندوق الوطني لتنمية الرياضة. غير هاد العام اللي سالها غادي يوصل لهاد الصندوق 270 مليون درهم. ايلى مشات هاد المؤسسة ضاعو هاد لفلوس كلهم ومعاه ضاعت الرياضة اللي اصلا كتعاني من موارد مالية
ما كايناش غير المغربية للالعاب والرياضة كاين شركة تدبير اليانصيب الوطني للي عندها اللوطو وكاين الشركة الملكية لتشجيع الفرس اللي عندها جوج مهمات "تدبير أنشطة السباقات و الرهانات المرتبطة بها داخل المغرب و خارجه. وتتمثل مهمتها في تدبير قطاع الخيليات عن طريق تحسين سلالة الخيول".
باش تكون عندكم فكرة مجموع ارقام المعاملات ديال الشركات بثلاثة هي 45 مليار درهم الدولة كدخل منها غير فالضرائب 5 مليار درهم وتمويلها للرياضة والاعمال الاجتماعية وقطاع الخيول 5،3 مليار درهم والاداءات التي تدفع للمراهنين على شكل ارباح تصل 31 مليار درهم والمغرب يالله عندو 2000 نقطة بيع ل3 مليون لاعب رهان او قمار او اللي بغيتو. ها الشي كلو غادي يمشي بالتدريج الى المادة اللي فقانون الصحافة صادق عليها مجلس النواب والمستشارين. الخلفي كيكول ليه فكل الدول كاين المغرب. كذوب ماشي بصاح كاين التقنين ما كاينش المنع. فتركيا عندهم بحال المغربية للالعاب.
المنع الكلي للمواد الدعائية غادي يخلق المشاكل اللي ما عمر الخلفي فكر فيها. دابا والدولة مراقبة وشوفو شحال ديال الرياشة خدامين وغدا باش ما تبقاش كلشي غادي يولي يمشي عند الرياشة كلي القمارة او لاعبي الرهان اللي عددهم 3 مليون مغربي "السيناريو الأسوأ، وهو لم يعد شيئا مستبعدا في الحالة الراهنة، يتمثل في توقف أنشطة كل من المغربية للألعاب و الرياضة و شركة تدبير اليانصيب الوطني نتيجة تخلي متعهد عملياتهما أنترالوت، الذي قد يضطر لمغادرة المغرب قبل انقضاء فترة العقد المبرم مع شركات الرهان، بسبب التنامي الواضح للمناخ العدائي ضد أنشطته" يشرح مصدر ل"كود".
يعني داعش ديال اليانصيب واللوطو وطوطو فوت غاديين يلقاو راحتهم فالمغرب وحلها هاديك الساعة يا الخلفي