التجمعي محمد عبو الوزير المنتدب في التجارة الخارجية محيح هاد الايام. ماشي بخدمتو وبصفقات كبيرة تقدر تعاون التجارة الخارجية للبلاد. هاد الشي كيديرو الوزير الباطرون عليه مولاي حفيظ العلمي، ولكن بقضايا كلها عندها علاقة بالعائلة ولفلوس واللهفة. قبل ايام سافر الى السعودية ومن غبائه في التواصل دار صورة عائلتو قبل وبعد العمرة. كاين مشكل كبير ان عبو كان فالسعودية فنشاط رسمي ودار العمرة. السؤال المنطقي شكون خلص على العائلة؟ حسب روايتو هو "اولادي خلصت عليهم وانا كنت فالسعودية معروض". جواب يدينه. حقاش يستحيل اللي كيعرف دول الخليج ما يخلصوش على ابناء وزير. طبعا بلا ما نتكلمو على الفيزا وعلى امور اخرى اللي فيها الزبونية. دازت لفضيحة جات فضيحة اكبر. بنتو كتبيع الماكياج ولات فالوفد الرسمي بل ومستشارة كبيرة لوالدها. كان الشي فشي مؤتمر بمنظمة التعاون الاسلامي باسطمبول. بنتو كميليا تقدمات على انها مستشارة. اجويتو ليومية "اخبار اليوم" تدينه. ما مقنعة ما ستى حمص. ما عارفينش علاش اصلا مشات هاد البنت. كيفاش وزير يسمح لنفسو تكون بنتو اصلا فوفد. غير تفاديا للقيل والقال كان خاصو يبعد الشبهات. هو ماشي بعدها هو تخشى فالشبهات. ولات فالوفد الرسمي وقبلات تكون حدا باباها وباباها عجبو الحال وحتى تفجرات القضية عاد انتبهو بللي كاين مشكلة. غير على هاد الشي كان خاص هاد الوزير يحشم على عراضو ويستاقل. عوض يحشم ناض كال ليك وقع خطأ ووووو ماشي مشكل وقع خطأ علاش ما صلحتيهش فالحين. علاش ما كلتيش للمنظمين حيدو لي هاد البادج ثم كيفاش وفد غادي يدير صفة لوحدة ايلى ما كانش شي حد سل ليهم القائمة وكال ليهم كل واحد وصفتو الوزير الشبح حقاش عاطيها غير للدوران وكلشي كيديرو مولاي حفيظ العلمي عوض يتكمش مشوه المغرب والحكومة
