هاد لفقيه لايت مابغا يحشم. الشويخ سار كيتشفى حتى فالموت وداير فيها شيخ الفاضلين

واش هاد تاجر الدين لي كيسمي راسو الشيخ سار ملقاش لي يحبسو عند حدو حيت راه مزال ما بغاش يحشم ويقول باركة من ديك المنشورات لي كيتشفى بها من هادوك لي كيعتبرهم هو خارجين عن تعاليم الإسلام.
آخر المنشورات ديالو فهاد السياق كانت حول حادثة السير الخايبة بالدار البيضاء لي مشا ضحيتها شاب وشابة ولي انتشرت بشكل واسع بين مغاربة الفيسبوك.
الشيخ سار لي ما عندو حتى علاقة بالمشيخة كتب معلقا على الحادث المأساوي أن هادوك لي ماتو فيها راه "شاب وصديقته (صديقته وليست زوجته) كانا على متن دراجة نارية.. أظن الرسالة واضحة جدا.."، بحسب تعبيره.
يعني بغا يقول أن الله انتقم منهم بسبب علاقتهم "غير الشرعية" وكيفاش تشرح لينا أ لي فاهم الدين بالمقلوب دوك الحوادث لي كيمشي ضحيتها راجل ومراتو وكيفاش تشرح لينا علاش فقيه حامل لكتاب الله ولسنة رسوله بغى ينتحر حرقا هادي شي يامات فمدينة سيدي قاسم.
وغير باش نذكركم أن الشيخ سار عندو سوابق أخرى فهاد الموضوع، ومنها مثلا أن مؤخرة هيفاء وهبي هي المسؤولة على الجفاف في بلاد المسلمين ولباس لعيالات هو لي كيخليهم يتعرضو للتحرش فالشوارع.