الفعفاع يمكن تنتاقدو فكلشي كوزير للخارجية ورئيس للحزب ولكن استعمال فيديو شخصي فقصارة خاصة وقاحة ووضاعة من خصومو: ايها الحقراء احترمو الحريات الشخصية وبعدوها فتصفية الحسابات

الليلة تداول فبسبوكيون على نطاق واسع مقطعا مصورا لوزير الخارجية والتعاون صلاح الدين مزوار، بأحد الملاهي الليلية بالعاصمة القطرية الدوحة على ضوء إحدى الزيارات الملكية، حسب مصور الفيديو.
هاد الفيديو ديال الفعفاع فضيحة بكل المقاييس واللي صوروا خاصو يتابع ويتحاكم. قال باللي فالدوحة واش هاد قطر اللي ما فيها حتى واحد كيتفنفن وكلها كاميرات ما تعرفش هاد الوضيع اللي صور فيديو لشخصية ما يهمناش يكون مزوار ولا غيرو وكيشهر بيه.
طبعا كاينة مسؤولية الاجهزة المغربية اللي كتخدم فالخارج "لادجيد" كيفاش تخلي واحد يصور بركة لوزير الخارجية بلا ما يعيقو. حتى الوزير عندو نصيب حقاش خاصو يكون يعرف فين يمشي.
هاد الشي خطير لانه يوظف الحياة الخاصة في تصفية الحسابات السياسية. مزوار اللي بغى ينتاقدو كوزير للخارجية وزعيم للحزب كاين عطى الله فين تشد ولكن بعدو على الحياة الخاصة. فالفيديو جبد الهمة مستشار الملك واخا ما واضحش باللي كان جالس. كيبان هدف الفيديو انه باغي يشوه سمعة المستشار والوزير.
وهاد الحقير اللي صورو خاصو يتحاكم واخا ايلى حصل فقطر ما عمرو يحلم بمحاكمة عادلة.