ها علاش لفرانسيس حاكمين فمهرجان مراكش. شوفو هاد صارم الفاسي الفهري شحال ضعيف وعيان

منين يكون بنادم ما ضابطش أمورو ما خاصوش يمشي لموعد بحال ديال بلال مرميد على قناة "مدي 1 تيڤي"،و صارم الفاسي الفهري مدير المركز السينمائي المغربي نائب رئيس مؤسسة مهرجان مراكش اللي كتنظم مهرجان مراكش اللي كان ضيف في الإف ب م ديال مرميد بان ضعيف بزاف و كل الاجوبة ديالو بينات بأنه كاين مشكل حقيقي.
السيد جا يدافع على برونو بارد المدير الفني الفرنساوي اللي وضحليه بلال بأنه ما كايجيب حتى فيلم في العرض الاول ديالو و هو المعيار باش كايتم وضع مهرجان في المرتبة ألف أو باء أو جيم.
هادشي واخا شرحتلو ما فهموش. من بين التفاصيل اللي كاتضحك ان صارم قال على فيلم "عمي" ديال نسيم عباسي اللي تعرض فتكريم عبد الرؤوف بأنه ضعيف واخا هو اللي اختارو، و من بين التفاصيل اللي كاتبين ان صارم خارج الإطار انه سبق أعلن ان الانتاجات الأجنبية غادي تستفد من تخفيض ديال عشرين في المائة ديال الضريبة و هو اللي ما تحققش و قاليه مرميد ما تبقاش تعلن على شي حاجة ما كايناش لانها كذبة كبيرة.
في الاخير قاليه بلال ما تبقاش تتسرع و تسنى حتى تكون الحاجة عاد أعلن عليها و قاليه صارم بحال التلميذ متفق آمرميد.
صارم الفاسي حرجو الكاريكاتور اللي بين الصايل المدير السابق ديال السي سي ام كايطلق الزربية الحمراء و صارم كايجمعها لانه فعلا جمع و طوى مع السينما المغربية.
من هادشي كامل مواجهة ما متكافآش و بلال مرميد بان هو المدير و صارم متفرج،و هادشي علاش المدير الفني الفرنسي ديال مهرجان مراكش كايدير اللي بغى.خلاصة القول: صارم ما تبقاش تمشي عند مرميد،و ما تفضحش راسك.