وفين رئيس مؤسسة مهرجان مراكش وفين النواب ديالو. كاليك هاد الفرنسي انا ربكم الاعلى اقرر ما اشاء وسينما ديالكم عيانة غير فلوسكم مزيانة

خرجة برونو بارد اللي هو المدير الفني لمهرجان مراكش الدولي للفيلم بالاضافة الى انه مول "بيبليك سيستام" اللي كتنظم المهرجان. واكل هنا ولهيه. خرجته اكبر اهانة لرئيس مؤسسة مهرجان مراكش الدولي ومساعديه ونائبي الرئيس. هما كيكولو حنا المنظمين لفرانسيس غير خدامين عندنا وهاد الاخ المتعجرف اللي كيحتاقر كل ما هو مغربي كيكول العكس. فحوارو مع تيل كيل" واخا ما كيبردش الغدايد طلق واحد الكلمات دالة على شخصيته على نظرته للمغرب.
سولوه علاش ما اختاريتيش حتى فيلم مغربي فهاد المسابقة قال شفت 13 فيلم وحتى واحد ما يصلح. هادي عادية ممكن توقع واخا الناس اللي شافو افلام المسابقة الرسمية عندهم راي اخر. غير اللي ما مفهومش. هو انه تحدث على انه يقدر يشوف معاه نائب الرئيس اي لعرايشي فيصل مول التلفزيون وصارم الفاسي الفهري مول المركز السينمائي المغربي ولكن القرار الاخير ليه. اييه اسيدي انت خدام عندهم والقرار الاخير ليك. الفضيحة انه قالها بفمو فمهرجان كان كاينة ادارة فنية ولكن الرئيس ديال المهرجان عندو كلمتو. هادي فكاع المهرجانات. حقاش خدمتو تقنية وكاين التوجه العام والسياسة فالسينما وووو. اختيار السينما الروسية هاد العام ماشي غير حقاش السينما عندهم مزيان ولكن حقاش المغرب وروسيا بداو علاقات جديدة. العام الجاي ممكن تكون السينما النيجيرية علاش المغرب بدا علاقات اقتصادية معاهم وهما هوليود افريقيا كينتجو بزافت الافلام. يعني ان الرئيس ونوابو كيحددو التوجه العام للمهرجان يا السي بارد. غير فحالة مراكش هاد بارد اللي كان ومازال كيحتاقر نواب الرئيس ومتكبر ويقدر ما يسلمش حتي عليهم واخا هو خدام عندهم٬ مختلفة.
حقاش كاين بحال لعرايشي والفاسي الفهري هما النواب وحقاش مساعدي الامير ما فيدهمش حتى هما بحال الجواهري والبقالي. ما فيديهمش فالسينما وخلاو لفرانسيس يديرو ما بغاو