على حسب ما كيروج، وهاد الشي كيخلع بزاف وكيبرد الما في الركابي كثر من الأفلام لكبار ديال الخلعة، كتوصل الميزانية ديال مهرجان مراكش –قراوها مزيان- 80 مليون درهم، باش ما تخلعوش بزاف إلى صرفتها لكم بالسنتيم (8 ديال لملاير ديال السنتيم) ! وما تخلعوش بزاف بهاد المبلغ ديال الميزانية العامة، خليوا شوية ديال الخلعة للخلصة ديال مديرة المهرجان، الفرنسية ميليتا توسكون دي بلونتيي، لي ورثاث الإدارة على راجلها الله إرحمو ووسع عليه، ولي كتبلغ تقريبا 275 مليون سنتيم في العام (ميتين وخمسة وسبعين مليون)، يعني معدل ديال 23 مليون في الشهر !.. على هاد لحساب كنكول للإصدقاء ديالي، بحال بلعيد أكريديس الله إدكره بخير، لي كيحسبوا الخلصة ديال لوزير لول المغربي كبيرة بلا قياس، وهي ما كتعداش 10 مليون سنتيم في الشهر، أنا فبلاصته نفضل نكون مدير ديال مهرجان مراكش على صداع الراس ديال وزير أول، وخا عارف ما غادينش يعطيوني هاد الفرصة حنت أنا كنعرف غير أغراس أغراس، ما كنعرف لا نغش لا ندريبلي لا نمسح الكابا للي كيسوى ولي ما كيسواش !.. إوى بلا ما نوصلوا لداك الشي لي كيربح المدير الفني ديال المهرجان السيد المحترم جدا برينو بارد، وخصوصا لداك الشي لي كتدي الشركة الفرنسية ديالهم "بيبليك سيستيم سينما" لي كتخلص مجموع المصاريف السنوية ديالها على ظهر مهرجان مراكش، حنت خفت لا تسخفوا إلى عرفتوه، خصوصا لي عندهم القلب ضعيف، ويصدق شي واحد ساكت ليه القلب الله يحد الباس ! خصوصا المنتجين والمخرجين لي واحلين وخاصهم غير شي ملينات قلال باش إكملوا الفيلمات ديالهم وما لقاوهاش، بحال الصديق المخرج محمد منخار !.. ولي من بعد معاناة كبيرة، "كدها كد سخط الله" كيف كيكول المايسترو مصطفى الدرقاوي الله إدكرو بخير ويشافيه، غادي إجيو من بعد السيدين المحترمين جدا برينو بارد وصارم الفاسي الفهري وإكولوا ليهم هادوا أفلام عيانين بزاف سيروا دوزوهم في زحيليكة ولى في شي قرينة كحلة، مع كامل احترامي لسكان زحيليكة !.. وفي لخر بغيت نكول راه ميليتا، لي ورثاث إدارة المهرجان، وبرينو بارد ما جاوش أعمروا هاد السنين كلها وهما محتلين هاد المهرجان أكيحلبوا فيه، راهم بقاو حنت عندهم الدعم غير المباشر ديال واحد الجيش عرمرم ديال الصحفيين والنقاد المرتزقة، عفوا "النقاقيد" كيف كيكول الصديق بلال مرميد الله إدكره بخير، الله إنجينا وإنجيكم من جهلهم السوليمائي وتضلعهم فقط في السنطيحة وكريان لحناك كيف كيكول صديقي بلعيد الله إحفظه… وجيش آخر ديال المخرجين والمنتجين من صحاب "كولوا العام زين" ولي أغلبهم عندهم السوليما غير خضرة فوق طعام، ما كيعيشوش منعا وليها، ها لي كيبيع الدوا، ها لي فارماسيان، ها لي أستاد جامعي، ها لي موظف في شي مؤسسة عمومية… وعاد الجيش ديال المتطفلين لي ما مشاركين في أفلام، ولا في ندوات، ولا في ورشات، ولا في أي نشاط ديال المهرجان، كيتبندوا فقط في "طابي لحمر" –لي بكثرة لوسخ لي تنشر فوقه كحال هاد العام- في لفتتاح ولختتام وحفلات التكريم، والما باقي كيسيحوا مع راسهم في الأماكن الجميلة ديال مراكش، بالصحة والراحة !.. وما تخلعوش وتكولوا راه الجيش ديال "النقاقيد" غادي يهجم علي ويخرج على العرض ديال الأفلام ديالي، غير كونوا متيقنين بلي ما عندهم حتى تأثير على الجمهور، وهداك التخربيق لي كيكتبوا ما كيقراه حد، كيقراوه غير بعضياتهم ! والنقاد ديال بصح راهم معروفين ومحسوبين على وؤوس الأصابع !.. واحد الصديق كال لي ولكن راك ملي كتنتقد مهرجان مراكش كتوجه كذلك للأمير مولاي رشيد لأنه الرئيس ديال المؤسسة ديال المهرجان. كلت ليه بكل بساطة، الأمير على راسي وعيني وهو بعيد على كل انتقاد، حنت ماشي هو لي كيختار الأفلام، ولا المعروضين، ولا المكرمين… هو المؤسس والأب الروحي ديال المهرجان وقصده ديما شريف بحال أصله، وحتى واحد ما عنده ما يكول فهاد الشي وأنا أولهم… وبه الإعلام والسلام,
