انفراد. ديوها فالانتخابات؟ سفاراتنا ف20 دولة مشلولة هادي 15 يوم: فراغ خطير اداري وديبلوماسي بسباب هاد القرار

عادل المكناسي وهند لكلاوي /////
كلشي مشغول بالانتخابات وما مسوقش للخارجية المغربية للديلوماسية المغربية. دابا شكون كيحكم فالخارجية؟ اكيد ماشي الفعفاع صلاح الدين مزوار اللي ظاهريا وزير الخارجية. يمكن ناصر بوريطة الوزير المنتدب في الخارجية يمكن الطيب الفاسي الفهري مستشار الملك. علاش هاد الشي؟ حقاش كاينة واحد الوضعية كارثية تعيشها الديبلوماسية المغربية في عشرين دولة. حسب معطيات حصلت عليها "كود" فان 20 سفارة مغربية لا تتوفر لا على سفير ولا على منصب القائم بالاعمال اللي يقدر يصرف ويدبر بعض الامور في غياب السفراء. دابا مثلا٬ تضيف مصادر "كود"٬ ما كاينش اللي غادي يوقع ما يسمى بالمصاريف الجارية ولا خلاص العاملين المغاربة والاجانب المتعاقدين معهم محليا.
مع هاد الانتخابات حتى واحد ما هامو هاد الفراغ الخطير وحتى حد ما عارف وقتاش غادي يسالي.
علاش هاد الشي وقع كلو؟ وقع باش الكاتب العام للخارجية محمد علي الازرق اللي طلع زرگ اسم على مسمى رسل٬ وفق مصدر ديبلوماسي ل"كود"٬ رسالة لعشرين سفير كيخبرهم باللي مهمتهم سالات وخاصهم يقادو امورهم ويدخلو. اي يديرو الاجراءات اللازمة باش يودعوا سلطات البلد قبل 15 شتنبر
هاد التخربيق واللخبطة كلها عندها علاقة بالتعيينات الجديدة للسفراء. دابا هاهما جاو وقتاش يتم تعيينهم؟ شكون عارف. كان على الخارجية حتى يعين الملك السفراء الجدد عاد يرسل هاداك الزرگ رسالتو الغبية