الدكتور أكنوش يرد بقسوة على أسامة بنكيران: صفة "أستاذ زائر" ماكايناش ف المغرب و هادشي اَ ولدي راه محسوبية

د. عبد اللطيف أكنوش- أستاذ باحث ،جامعة الحسن الأول- سطات
—
لا آولدي أسامة لا..كلامك هو الكبير!!
سي أسامة بنكيران قال لكود في اتصال هاتفي: "أنا في الكلية غير أستاذ زائر ودرتها فتطوان العام اللي فات" !
هاذي آولدي عذر أكبر من الزلة…علاش؟
أولا: "الصفة ديال أستاذ زائر" Professeur visiteur ما موجوداش عندنا في التشريعات الخاصة بالتعليم العالي ديالنا وفي جامعاتنا…وحتى "صفة أستاذ شريك" Professeur associé ما كايناش عندنا..هاذي وحدة.
ثانيا، على افتراض أننا نديرو عين ميكا ونقولو ماكاين باس، الأستاذ الزائر لا بد ليه "لزوما" مايكون عندو دكتوراة، ويكون أستاذ مساعد أو مؤهل "مرسم" في أسلاك التعليم وللي فيها على التوالي: أستاذ مساعد، أستاذ مؤهل، وأستاذ التعليم العالي (درجة A أو B أو C ، ودابا وزيركوم غادي يزيد D علاما سمعت ! )..وما قلته في هذا الباب يصدق على ما يسمى أستاذ "vacataire"!!
ثالثا: هاذ النظام ديال "الأستاذ الزائر" و"الأستاذ الشريك" راه كبير بزاااااااااف عند البلدان للي عندهوم العقل، وكا يعرفو شنو هو التعليم العالي، وراه درناه حنا الجيل القديم حتى طاب كًلبنا، وباقين مرة مرة كانمشيو نديروه..والله وماعندك الصفة القانونية وما تكون "مرسم" في بلادك، وعند دكتورتك، ومعروف بأعمالك الجامعية، وعندك تجربة طويييلة في التعليم العالي وكا يعرفوها عن قرب، لا دوا معاك شي واحد…
رابعا: وما دام ما كاينش قانون حول هاذ "لي ستاتي" في المغرب، كيفاش غاديا الجامعة المغربية تخللصك؟؟؟ من أي "ريبريك بيدجيتير"؟؟؟ بالببخخ…واش غاديا تحسبها ليك ساعات إضافية؟؟ ماعندهاش الحق لأنك ماعندك الصفة ديال الترسيم وديال الشهادة…باستثناء يقللبو ليك على شي تبخنيسة باش يعطيوك الريالات للي "خدمتيها" ظلما وعدوانا…راني تضاربت حتى عييت باش نبدا نجيب "أساتذة زائرين"، وما قدرتش، لأن الجامعة شرحات ليا أننا ماعندناش قانون في هاذ المجال عكس فرنسا، وقللبنا حتى عيينا وما لقيناش كيفاش…
خامسا: أنا آولدي ماعندي كاسار في هاذشي، ما نتمنى ليك غير الخير والله يكمل عليك، غير كانكًول راهوم كثار وليدات الشعب للي كايطييروها من حداك في العلم والتكوين والجدية والمثابرة، وكانعرفهوم، وما قادرينش يديرو معاهوم هاذ الحل للي دارو ليك نتا..علاش زعما؟
حينت ولد رئيس الحكومة؟؟؟
سادسا: أنا للي بان ليا هو أن هاذ الناس للي زييدوك لهاذ تامارا كايووجدو ليك ريثما تدير دكتورتك، ويجيهوم شي منصب مالي، ويعطيوه ليك نتا اللول…وهذا الظلم والتحكم بعينيه..أو لا لا؟؟
سابعا وهي المهمة: كايبان ليا للي جررك لهاذ العجب، باغي يصففيها للوليد ديالك سياسيا، ماشي نتا هو المقصود من المناورة !!
أنا للي كانقول في هاذ القضية هو: واك واك آعباد الله راها ماشي أخلاقية…والله يجعل الذنب على الناس للي كايسييرو هاذ القطاع للي كايقططع في الكًلب بفضل الواليد ديالك الله يسامح ليه وحكومتو.
و اش توظيف الولاد في الإدارات العمومية قانوني؟
آييييه…ولكن ماشي أخلاقي آبا…الولاد compétents؟ إيوا جري عليهوم أبا يخدمو في بلادات الناس وبععد عليك الشبهات، باش نحتارمك ويحتارموك للي صووتو عليك…من غير هاذ الكلام غير هضرة وأناشيد..شوف أشنو واقع لفرانسوا فيون هاذ اليامات !!
سمعت كثير بللي الفساد للي وقع من 2011 للآن ما عمرو كان في البلاد..وكنت كانكًول بنادم غير كايزيد من عندو وخلاص…هاذ الناس الإسلاميين باقين جداد، وواعدو بالإصلاح و"بالمعقول" وغيرو، ماغاديش ينوضو يبداو يخربقو، ويعيدو إنتاج السنوات الكحلة القديمة…جوج ديال النقط عندي مشكلاني ها هي:
1- بدا كايدخلني الشك من النهار للي شفت سي مصطفى الخلفي كايتحرركً على "دفاتر التحملات" ديال التلفزات…قلت معا راسي، يمكن السيد بغا يصلح وبغا يدير شويا ديال "الحكامة الرشيدة" في هاذ الويل، الله يعاونو…ولكن آشنو درت؟
خوكوم خذا الدفاتر إياها، وطحنت مها…بان ليا السيد باغي يمشي بعييييييد بزاف…دوور بيه شي خرازا جايين من "قناة الجزيرة الخوانجية" وبدا كايفصصل ويخييط غير بوحدو..النتيجة هو أن الراجل بغا صراحة يخونج القطاع السمعي البصري بلا ما يحشم..ويحساب ليه الدولة ناعسة وماجايبة اخبار وما عارفة والو، وخورزية…السيد بغا بقطع الما والنعمة على الإنتاج التلفزي، وبغا يدير دياولو، وبزز على القنوات أنها ماتدير غير "الحوارات الاجتماعية والسياسية" بشرط يكون ديما حاضر فيها فقيه من دياولو…من حسن الحظ أن الدولة كًالت ليه :"احبس آ عززنا واحبس بللاتي..واسمع ليا نكًول ليك حديثي..حتى حنا عندنا مشاريع"، وشدات ذاك المشروع المشووه واعطاتو لنبيل بنعبدالله للي دار لجنة جديدة باش يسللك الأمور…الدولة دارت معاه "زوين" في هاذ القضية..
شويا ناض الغوت على "التعيينات في المناصب العليا"…شفت بللي الحصة للي مخخصة لرئيس الحكومة كبيرة بززاف، وكًلتها على نييتي لأنها جاتني خطيرة جدا…ناض ليا واحد المثقف كبييير بزاااف، وكًال ليا بلا حشمة: "واش عطاوه ما يعيين؟ غير المناصب الصغيرة، أما الماليك راه عندو غير الفوسفاط والمطارات وذاك الشي لغليظ"…حشمت نكًول ليه: "آ استاذ راك غير حيوان…لأن المناصب الصغيرة هي للي كاتدير الدولة لأنها هي قطب رحى التسيير اليومي للحياة العامة، وهي في علاقة مباشرة معا المواطنين، وقدد ما البيجيدي زرع فيها دياولو، قدد ما تمكن من مفاصل الدولة"..وهاني دابا كانكًولها ليه بالعلالي وما بقيتش غادي نحشم…آجي يا قمقوم الزمان، مللي يشددو ليك الإدارات الصغيرة، ومللي يشددو ليك التعليم، ومللي يشددو ليك التعليم العالي، آشنو بقا عندك ماتدير من تحديث ديال المجتمع، واش بقا عندك ماتدير لتطوير الحياة العامة نحو التقدم وروح العصر، وآشنو بقا عندك ماتدير في عملية إرساء "القيم الديمقراطية الكونية للي المغرب تقاتل عليها من الاستقلال؟…كون كان تدبير هاذ التعيينات خاضع لحكامة جيدة وخاضع لمبدأ "الحياد"، راني ماندويش…ولكن الأمور ماشي هاككا…
2- دابا كانشوف بللي السيد رئيس البيجيدي، ورئيس الحكومة المنتهية ولايته، والمكلف بتشكيل الحكومة المقبلة، ما كايراعيش حتى للناس للي صوتو عليه…واش نتا رافع شعار "لا للتوظيف في الإدارات العمومية"، وكاتدير جهدك كامل أنك تحبس على ولاد الحازقين التوظيف، ومدخخل بنتك "للأمانة العامة للحكومة"، مدخخل ولدك يا الله خاذ "ماستر" يقرري في كلية؟؟؟ آشنو هاذا؟؟؟
كولكوم كاتكًولو ليا راه هاذ الشي قانوني، راه ولاد ابن كيران ناس قاريين ومتمككنين، وcompétents ، وبحالهوم بحال ولاد الشعب، ما كًلت والو…راه هاذ الشي قانوني، ولكن راه ماشي أخلاقي، لأنهوم "جيستومان" ماشي بحال ولاد الشعب، لأن باهوم الشخصية الثانية في المملكة…الدراري متمككنين؟ واخا آسيدي…إيوا صيفطهوم أخويا للخارج يخدمو ويشتاغلو أساتذة في كليات فرنسا وأنجلترا وسنغافورة وأمريكا، وبععد عليك الشبهات، ودير بحال سيادك للي ماهوما وزراء ما حتى خريا…وإلا فما تبقاش تخربق عليا وتكًول ليا راه ولادي "متمككنين"…متمككنين من ياش؟؟
متمككنين غير من منصب باهوم وحكومتو وحزبو ومن أذرع الفساد للي زرعها الواليد في الإدارت العمومية "الصغيوورة"؟؟؟