حوار ديال بلعاني مع برلماني

نحن اليوم سعداء جدا بلقائك أ السي البرلماني.
حتانا فرحان بزاف ملي شفتو فيا أو تفكرتوني فهاذ الوقت بالذات اللي محتاج نبان فيها شويا.
ما رأيك في الأحزاب السياسية\"؟
الأحزاب عندي أنا بحال الشمبرير .كنستعملها للركوب فقط ملي كنقطع الواد كنخليها.
عطينا التجربة ديالك في التحزب؟
الطومبيل : خليتها
الساعة : لحتها
السبولة : سمحْت فيها
فركيسون : هانا راكب فيه أو كنحرث بيه حتا الجبل
السي البرلماني : كيف تعمل في الأداء البرلماني ؟
أنا ديما كنتحرك ماﮜانزكاش .و الحملة الانتخابية ديما كانديرها .
بحال أش؟
إوا : الحملة ديالي فشي شكل ، كنبدا بالكبار بحال القايد أو المدراء، كنواعدهوم إوليوْ عُمال . الخلفان كنوعْدهوم إوليوْ قيادْ.
أو الصغار : راك عارف الخطية ديال الجيب ماشفها حْد..
فين كتلقا الدات ديالك ؟
الصراحة ..الفتنة أو الخواض هما فين كنلقا الدات ديالي ، أو جنوني كيبقاوْ على خواطرهوم.
السي البرلماني : فالحقيقة النقطة اللي جابتنا عندك هي المسيرة اللي مشات لرباط هاد السيمانا واش نتا لي مُوراها؟
ولاينّ على منحوسْ! زعما ما لقيتي ﮔاع فاش تسول غير هاد السؤال هادا.
على كل حال غادي نجاوبك. نتا راك ناعس راه هادي هيا الخدمة .
كيفاش؟
المشاريع جايا جايا اللهم نديرو فيها إدينا راه 2012 مابقا ليها والو.
عاود لينا كيفاش ؟
أنا عايق أو فايق . كنكلها فالسما. كندير الوسيط بيني أو بين المواطنين. كنصيفت ليهم شي باراكا. و لكن ماكانبانش . كانتاصل بيهم عبر الهاتف. أو كنوصيهم الا سوالهوم شي واحد من السلطة إقولو ليه راه ولد العدو ديالي. باش نشريليه السلك معا المخزن. أو نوسخ ليه الدوصي معاهوم.
واش فراسك بلا عاقوبيك .؟
أويلي ؟ عرفو كولشي . أش من أوجه مازال عندي . أشمن وجه غادي نوري للسي علي .
واش مازال غادي تنوَضْ شي حايحا هاد الصيف ؟
لالالالا غادي نشد لارض حتا إنساو هادي . دابا الهدوء أو الحيطة.
متى تظهر بقوة في الساحة؟
في التدشينات مع العامل . كنكون القدام. أو كنقول للمواطنين راه أنا اللي جبت ليكوم المشاريع .
إوا ماشي حشومة عليك : حتا المشاريع ديال سيدنا فالمبادرة الوطنية كاتقوليهم أنا ليجبْتها؟
لالا راه ماشي منوالا كانقولها ليه. غير هادوك اللي مقلوبة عليهم القفة.
شحال من حرفة عنك ؟
أنا برلماني. أو رئيس جماعة . أو أستاذ شبح . من هادوك اللي كيتخلصو ﮜالسين . أو كاينة وحدة أخرى . خليها حتال شي حوار أخر او نقولهاليك.
ما رأيك في الشخصيات و الأحداث التالية؟
عامل الاقليم : باغي المعقول. و لايني هاد المعقول مامسلكنيش . باغي إطبق علينا القانون واخا عدنا الحصانة .
علاه أش جاب الحصانة للجماعة؟
هاديك الحصانة كاتنفع فكولشي.
واخا. ما رأيك في رئيس المجلس الاقليمي؟
واش جاي دير معايا الحوار أولا تفقسني. راه هاداك ماكنحملوش أعباد الله.
أش بانليك فانتخابات 2012 التشريعية؟
شاداني الخلعة من دابا . أو حسيت بلي بداو كاتافقو عليا. بغاو إهرسوني العديان اللي دايرين بيا.
باش غادي ترشح عاوتاني؟ السرديلة وَلا الطاجين؟. أشمن رمز بالضبط؟
إلا مالقيتش منين ندوز لفرﮜيسون. نترشح بالشاريو ديالو. ولا المحراث. المهم. شيحاجا اللي كتخدم مع التراكتور.
قولينا شي كلمة نختمو بها هاد الحوار؟
واش تقدرو تكتبو عليا شيحاجا مزيانة تغسلو بها هاد الوجه اللي توسخ. العملة ماتخممش!!
لا يا السي البرلماني. راه حنا بغينا نخدمو البلاد. ماكانشدوش الرشوة. (البرلماني . زعف أو بغا إقول شيحاجا.)
يضيف : ماشي رشوة هادي غير هدية باش تبقى المحبة دايمة.
واقيلا كاتسحاب بحالنا بحال هادوك اللي كاتشري في الانتخابات. قالوا نتا شاد معاك شي حجاب أ السي البرلماني؟
راه ماكاين لا حجاب و لا هم يحزنون. راه غير كانزرب على بنادم. أو كايسخرو ليا الله.
آخر سؤال : واش مازال تتستعمل العنف معا اللي كايعارضك ؟
واحد المثل كايﮕول بللي سخونية الراس كاترجع على مولاها بالبرودة. دابا راني نادم على كول مادرت . وليت بارد بارد... خاصني نعاود نرجع لمكة باش نغسل دنوبي . أو نتصالح معا كولشي قبل 2012.
حاور البرلماني: أبو ريان
العدد 6 يوليوز 2010 أحداث أزيلال