الاحرار عندهم وزرا مقادين باستثناء هاداك اوجار السفير الفاشل اللي سقط سهوا بوزارة العدل. شوفو غير صحابو تعرفوه اكثر: سلامة وبوهريز

اللي شاف وزراء التجمع الوطني للاحرار سواء كانو فالحزب ولا جابوهم ليه غادي يوقف على نقطة وحدة. كلهم كيفهمو فالقطاع اللي شدوه. كيعرفو وفيديهم. كلهم كلمة كبيرة نقولو الغالبية العظمى. لا اخنوش لا بوسعيد لا مولاي حفيظ العلمي لا رشيد الطالبي العلمي لا لمياء الطالبي لا مباركة بوعيدة.
واحد طوكار فهاد التشكيلة هو محمد اوجار. السيد بدا فالصحافة مع محمد بنعيسى وداز عند عبد الهادي العلمي. سالا هاد الشي وكان فحزب الاحرار كل مرة مع الجهة الرابحة. مع عصمان وولى مع المنصوري وقلب عليه وولى مع مزوار وما بقاتش العلاقة هي هاديك ودافع عليه ورسلو سفير للمغرب فجنيف وباش جابو اخنوش ولى معاه.
السيد ما احترمش مهمتو كسفير وكتب مقال وهو سفير. تصرف ما مسبوقش. كان عارف راسو غادي يتجازى.
اوجار اللي دوز وزارة حقوق الانسان مع الحسن الثاني واللي ما صالحة والو دار مشروع اعلامي اسمو الشروق وعيان فاشل وقبلها مركز خدم فيه خوه وتابعه اللي فين ما مشى يديه.
اوجار لبس فيستة كبر منو بزاف بزاف للي هي وزارة العدل ما عندوش ثقافة قانونية. "الصباح" كتبت عليه اليوم وقالت معلومة توضح شكون هو هاد وزير العدل "مازال مخلصا لاصدقائه الذين كانوا يدعمونه ماديا ومعنويا من داخل الاحرار ابرزهم عبد القادر سلامة ومحمد بوهريز" وعرفتو شكون صحابو وصافي باراكا