لعنة لمغاربة خرجات فيه: كيفاش ربح بلفقيه لشكر فمعركة واد نون. كاع البرلمانيين ورؤساء الجماعات فالجهة ورؤساء الغرف و10 من قيادة الحزب وشعارات "ارحل" ترفعات ضد الكاتب الاول

ادريس لشكر الكاتب الاول لحزب الاتحاد الاشتراكي تقولب بزاف. بغى يقطع اجتماع الكاتب الجهوي للحزب عبد الوهاب بلفقيه وطلب من السلطات تمنع لقاء اليوم للكتابة الجهوية لحزب الإتحاد الإشتراكي للقوات الشعبية.
لشكر راسل وزير الداخلية عبد الوافي لفتيت ووالي جهة كلميم وادنون محمد بنرباك لمنع النشاط. غير اللي منظمينو كان عندهم رد اخر "هادا الاجتماع قرره ادريس لشكر وكان خاصو يكون قبل الاعلان على الحكومة وطلب يتاجل واليوم تعقد" يشرح اتحادي من كلميم ل"كود".
لشكر تبرأ من بلفقيه وحيدو من منصبو فبيان وخلى كاتب اقليمي للحزب اللي هو عمر ابكير يخرج بيان البارح الجمعة حذر فيه من انعقاد أي نشاط حزبي خارج الضوابط القانونية في إشارة لاستيفاء الكتابة الجهوية للآجال القانونية كما حدد لها في النظام الأساسي والمادة 69 . هاد الشي كلو ما صدقش "راه حاول يدخل القوات العمومية ووو وكلشي فشل".
الاجتماع انعقد وحضره حسب اتحادي شي الفين شخص "هادوك العشرة اللي دارو بيان الدار البيضاء وكلهم من المكتب السياسي حضرو بحال العلمي والديساوي وحسناء ابو زيد….. وحتى طبيح معانا غير طارئ ما خلاهش يجي من كازا" يحكي مصدر "كود".
ماشي غير هاد الشي جا "جميع رؤساء الجماعات الاتحاديين تقريبا شي 30 جماعة وجميع رؤساء الغرف الاتحاديين فالجهة وكاع برلماني الجهة وتقريبا الفريق ديال مجلس المستشارين وجاو حتى اللي عينهم لشكر البارح" يقول المصدر وهو ناشط.
المصدر اعتبر هذا الاجتماع الرد الانسب ضد لشكر "ماشي حقاش قالو ليه ارحل ولكن حقاش بين باللي بعيد على الحزب وما فاهم والو".