وكاع لعجب خرج فوزراء حكومة ابن عرفة. اكبر اهانة كيتعرضو ليها النسا وقعات فهاد الحكومة. وزيرات ل"كود": وضعيتنا كارثية ورجال باغيين يحجرو علينا وجابونا غير للواجهة وشهرين ما عندنا اختصاصات والديوان بلا خلاص

ياك قلناها ليكم. راه مع حكومة ابن عرفة اللي خرج من النهار الاول مايل غادين تشوفو لفضايح. بعد السكوت على ما يقع فالحسيمة وبعد تدبير الملف من قبل وزير الداخلية ماشي ابن عرفة. بانت فضيحة اخرى اكداتها ل"كود" عدد من الوزيرات اللي فمنصب كاتبات دولة.
مصدر "كود" الحكومي كالو باللي الوزيرات اللي تعينو فهاد الحكومة فمنصب كاتبات دولة هادي شهرين ما عندهمش خدمة. "باستثناء وزير الطاقة والمعادن عزيز الرباح اللي خرج لكاتبة الدولة نزهة الوافي اختصاصاتها. حتى وزير ما دار بحالو" تقول مسؤولة حكومية اللي وصفاتو بالشهم الشجاع. مسؤولة اخرى اكدت ل"كود" ان بعض الوزراء دارو اختصاصات للمديرين وخلاو كتاب وكاتبات الدولة.
كاتبة الدولة في قطاع اخر اعتبرت هذا الامر في تصريحها ل"كود" بانه استهداف للمرأة. كيف يعقل ان نساء معينات من طرف صاحب الجلالة ما عندهمش اختصاصات بعد شهرين واش جابونا توجيهة". مصدر حكومي اكد ل"كود" ان هاد الامر فيه مبالغة بزاف "اولا كاين كتاب دولة رجال ماشي غير كتاب دولة نساء اللي كينتاظرو الاختصاصات. ثانيا الحكومة يالله جات الوزير من حقو ياخد شوية الوقت والامور راها غادية".
كاتبة دولة ردت على هذا التصريح عبر "كود" بالقول "راه كاين مشاكل مع كاتبات دولة ووزراء كانو من عهد حكومة بنكيران. علاش غاديين يتسناو"
ماشي غير مشكلة الاختصاصات اللي مطروحة كاين حتى مشكلة التعويضات "كاتبات الدولة اللي جابو ديوان ديالهم راهم ما تخلصوش هادي شهرين. مساكن ما مخلصينش فهاد رمضان ولعواشر. حقاش كيتسناو السادة الوزراء يعطيوهم اختصاصات".
حسب مصدر "كود" بحال هاد المواضيع لا يمكن اثارتها في المجلس الحكومي. هاد المجلس منعقد بعد قليل فالرباط