ها لائحة وزراء حكومة بنعرفة العدالة والتنمية المتوقعة. فيها وزراء معاودين وشي جداد وكاينين بحال الخلفي للي قلب على بنكيران حاضر

حكومة بنعرفة العدالة والتنمية العثماني وصلات للمراحل النهائية. كاين اللي كيقول راه وصلهم للقصر وكاين اللي كيقول مازال شي تفاصيل. المهم الحكومة بعد يومين يتم تعيينها اي الثلاثاء او الاربعاء.
الحكومة فيها وفق المعطيات المسربة وجوه جديدة ولكن لقدام حاضرين. حسب مصدر ل"كود" فالتجمع الوطني للاحرار الرئيس عزيز اخنوش غادي يبقى فالفلاحة بعد ما تكبر ومحتمل جدا يكون وزير دولة. حقاش لا يعقل يكون فالترتيب ادنى مستوي من وزير عندو. مولاي حفيظ العلمي غادي يبقى فنفس الوزارة بعد ما يتم توسيع اختصاصاتها. محمد بوسعيد ممكن يكون فالداخلية ومستعبد جدا يبقى فالمالية. طبعا ايلى بغاو يبقاو حاميين الشرقي اضريس ويستمر يسير الوزارة واخا وزير منتدب
من الوزراء اللي يقدرو يبقاو مباركة بوعيدة ونوال المتوكل محتمل جدا ترجع. كاين احتمال يدخل فوزي لقجع للمالية.
فالاتحاد الدستوري وفق مصدر "كود" محتمل جدا ياخد محمد ساجيد التعمير او شي حاجة قريبة وشي حد اخر من هاد الحزب اللي دخل جنب للحكومة. الاتحاد الاشتراكي من المرشحين للاستوزار عبد الحميد لجماهري ويونس مجاهد وعبد الكريم بنعتيق وبنمسعود او حسناء ابو زيد.
فالحركة الشعبية اللي تقريبا باقي هي حكيمة الحيطي. طبعا غادي يقدر يبقى شي وزير من هادو ديالهم.
فالتقدم والاشتراكية ماشي بعيد يبقى نفس الفريق تقريبا نبيل بنعبد الله وشرفات افيلال وممكن شي وجه جديد
العدالة والتنمية فيها لقدام بحال الرميد والرباح والخلفي وعمارة وبسيمة الحقاوي وجميلة مصلي وكاين الجداد بحال بوانو وممكن يتيم.
العبادي مرشح باش يعوض احمد التوفيق فالاوقاف وناصر بوريطة المنطق يقول يكون هو وزير الخارجية ويجريو على الفعفاع
للاشارة باينة الحكومة الباسلة ديال بنعرفة العدالة والتنمية غادية تفوت 25 وزير بالاضافة الى كتاب دولة