انفراد. مسؤول كبير ل"كود": ياك الناس ديال الحسيمة طالبات بتدخل ملكي وها هو تدخل بنفسو وكان قاصح مع الحكومة واللي تهاون غادي يخلص: علاش خرجو فالعيد راه استفزاز كبير وراه كاينة اصابات بين الامن وبين المتظاهرين

قال مسؤول كبير في الدولة، ل"كود"، أنه "من الصعب تجميع المعطيات الكافية نظرا لبعد المسافة بين العاصمة والحسيمة وكاين دبا اتصالات داخلية وكاين تعقيدات والحكومة ما عندها علاقة بالتدخل الامني وهداك تدبير أمني".
واستغرب المسؤول من مسيرة يوم العيد بالحسيمة وقال ل"كود" : "واش يُعقل من بعد مْنِي اهضر الملك ومْنِي قال ديك لكلام اصْعيب وتوجيه اللّوم بشكل صريح لأعضاء حكوميين اللي اعتبرهم الملك معنيين بالمشاريع التي لم تنجز في الأوقات المناسبة وينوضو الناس ويخرجو للشارع مرة أخرى".
وأضاف ل"كود": "الملك أمر بتشكل لجنة من الداخلية والمالية والوزراء المعنيين بتأخير المشاريع معندهوش عطلة وواش كاين شي حاجة اكثر من هادشي؟؟ وياك الناس كانوا كيطالبو بتدخل ملكي إوا ها الملك تدخل وعلاش ناضو خرجو عاود وراه خاص نعطيو فرصة للدولة وها الملك تدخل بنفسو شنو باغيين آخور".
وعودة إلى التدخل الأمني، يضيف المسؤول، ل"كود": مني خرجو انهار العيد مكانش خاصهوم يديرو شي امور وتنزالق بديك الطريقة والناس ديال الداخلية كيقولو ان المواطنين هوما اللّي هجمو على القوات العمومية ولاحو عليهوم لحجر وكاين حوالي 40 عنصر أمني مضروب وفالآخر المواطنين كلاو لعصا بالمجان سواء البوليس او الطرف الاخر والقضية دبا معقدة والبوليس ماشي خنازير حتى هوما مواطنين، وحتى المواطنين ماشي صهاينة".
وزاد المسؤول نفسه بنبرات لا تخلو من الحزن ل"كود" "صعيب دابا نحملو مسؤولية لشي طرف. الوضع فشي شكل ولكن راه كلشي مصاب".
وكان محمد بودرا رئيس المجلس البلدي للحسيمة حمل في تدوينة له المسؤولية لما وقع الى جهات لم يسمها وظفت الاطفال وتسعى الى استمرار التوتر في الاقليم