شافو قد فمو قد دراعو: اليوم بصاح الياس العماري دخل تاريخ الاحزاب فالمغرب وخاص العنصر ولشكر وشباط يرددو كلنا الياس ويستاقلو

استقالة الياس العماري الامين العام لحزب الاصالة والمعاصرة من منصبه قرار شجاع. قرار ما يمكن الا ينوه به كل مغربي. الياس مشى من الحزب واخا يالله دوز عام و6 اشهر. مشى وهو فقوتو. الوحيد اللي تجاوب وبسرعة مع خطاب الملك محمد السادس يوم 29 يوليوز على خطاب العرش.
الياس استقال من الامانة العامة وهو واعي بهاد الفعل. خدا وقتو. تشاور مع راسو واكيد تشاور مع اقرب الاصدقاء والصديقات. خدا قرار كلشي الاحزاب السياسية خاصها تاخد منو قدوة.
بلا تحليلات تمشي بعيد ولا قريب. المهم هو الفعل. احزاب اخرى كتعيش مأسي وناسها متشبثين بمناصبهم. هو استقال وحزبو عندو 102 مقعد فمجلس النواب وكيرأس مجلس المستشارين. يعني ماشي شي حزب اللي جايب 20 مقعد وياخد مجلس النواب بحال تبهديلة الاتحاد الاشتراكي
اليوم هاد التجربة خاصها تتعمم. خاص سياسييين ياخدوه قدوة. خاص العنصر ولشكر وشباط وغيرهم يتبعوه. كلشي دوزو فترة طويلة على قيادة الحزب وخرجو على هاد الاحزاب. علاش ما يوليوش كلهم الياس