روح البصري فمجلس النواب اليوم: باش يحاربو فضيحة اغتصاب الاتحادي المكروه لحبيب المالكي للديموقراطية وينتاخبوه اليوم رئيسا لمجلس النواب: غضب فيسبوكي واستنجاد بالمنجرة وغيره لفضح "اللي داخلين فاللعبة"

بات مؤكدا ان لحبيب المالكي الاتحادي المكروه اللي ما كيبغيه حد خارج حزبو وحتى داخل حزبو كاين للي ما كيحملوش٬ هو اللي غادي يربح رئاسة مجلس النواب او بتعبير عدد من الفيسبوكيين غادي "يغتصب هاد الكرسي". حزب من اللاور لللاور. كل مرة مدلول عند شي حزب اخر. تلاح ففراش الاصالة والمعاصرة ولعب معاها. من بعد جاه الوحي الادمي ورغب التجمع الوطني للاحرار. ديما كان الكاتب الاول لهاد الحزب جار معاه هاداك المالكي اللي ما هو بحبيب.
تربية ادريس البصري وخدمته له خلاتو يتعلم التلوان وينسى الوردة ومبادئها. على كلشي هاد الشي الفايسبوك غاضب. شي كيهدد بعدم التصويت مستقبلا الى وصل هاد السيد لرئاسة مجلس النواب وشي كيسمي اليوم اغتصاب للديموقراطية لان حزب جاب الاعيان ومالين لفلوس وما خلى ما دار ويالله جاب 20 مقعد وبزز وفالاخير غادي ياخد شخص بحال المالكي منصب هو الثالث فهرم الدولة في الدستور المغربي بعد الملك ورئيس الحكومة.
هاد الغضب غادي يكبر مع شخص دوز وزارات وما عمرو طفرو من وزارة التعليم حتى لوزارة الفلاحة. الصورة اللي خلاها للمغاربة هو حبو للاوراق المزيانة باش يكتب وللشوكلاط.
باش يفضحو هاد العينة من المسؤولين المكروهين شي مشى للتاريخ وقلب على محاضرات المهدي المنجري باش يبين ويفضح جشع وازدواجية هاد السياسيين اللي داخلين فاللعبة وشي جبد ليه حياتو وخدمتو للقصر وشي قلب على علاقاتو بادرييس البصري
المهم تصرف اخر كيكول للمغاربة ديرو اللي بغيتو وحنا محكمين باللعبة ونجيبو اللي قدم لينا خدمات واصواتكم كولوها.