كيفاش قولبنا وزيري داخلية اسبانيا والمغرب وحضرونا للرباط وعطاونا سيد الهدري بلا فايدة. الوزير الاسباني بان ما فراسوش حتى لخبار وعطى معلومة غالطة

تفرح باش يكون شي حدث فهاد الشهر ديال العطلة اللي تخلط مع العيد وخلى لخبار كتغيب ما كايناش. ولكن هاد الفرحة كتولي بحال الشمتة او الفقصة باش تجي لهاد النشاط ويطلع خاوي بلا خبار بلا معطيات جديدة. هاد الشي اللي وقع لينا ف"كود" اليوم الثلاثاء 29 غشت 2017. الحدث مهم بزاف بزاف بزاف. لقاء بين وزيري داخلية المغرب واسبانيا.
خوان اكناسيو زويدو وزير الداخلية الاسباني يزور الرباط. باش هاد المسؤول يزورنا فهاد الوقت اي ايام بعد ما شهده اقليم كاتالونيا من احداث ارهابية ومورطين فيهم غير لمغاربة راه حدث كبير. غير رجعنا بوالو. بالانشاء بالهدرة.
باللي كان تعاون جيد بين المغرب واسبانيا خاصة على المستوى الامني. اشاد بهاد التنسيق الامني واعتبر انه نموذجي في علاقات الجوار بين دولتين صديقتين جارتين. تحدث عن قوة التعاون في محاربة الجريمة المنظمة كذلك والهجرة السرية بالاضافة الى الارهاب. تحدث عن شي 12 عملية مشتركة فهاد الجانب =تفكيك خلايا ارهابية=. طبعا دار الصواب وقال واخا هادوك اللي دارو العملية الارهابية من المغرب راهم ترباو فاسبانيا بلا ما يعطي تفاصيل. بل عطانا الكذوب. قال باللي جوج تشدو فالمغرب عندهم علاقة بهاد الخلية الارهابية ديال "لارامبرا". هاد لخبار كان كذبو عبد الحق خيام مدير المكتب المركزي للابحاث القضائية في تصريح لوكالة "ايفي" الاسبانية. قال باللي هادوك طلقهم المغرب.
وطبعا سالى بالخاتمة المآلوفة. خاص التعاون الجيد يتقوى راه حتى بلاد ما فمنأى عن الارهاب وحتى بلاد ما تقدر تحاربو بوحدها وشكر المغرب وعاود شكرو
عبد الوافي لفتيت وزير الداخلية المغربي حتى هو مشى فنفس المنوال. صفر خبر. كلشي انشاء. قال باللي الزيارة للتشاور حول قضايا ذات اهتمام مشترك خصوصا الارهاب. وعبر عن تضامن المغرب معه وذكر برسالة محمد السادس واشاد حتى هو بالتعاون العالي والنموذجي في المجال الامني وتحدث عن دور المساجد اللي ما مراقباش فتفريغ كافة اشكال الارهاب واعاد التاكيد على ضرورة استمرار التعاون الامني المغربي الاسباني.
شفتو ما قالو والو. انشاء فانشاء كلام فكلام