الناصيري تهلى فاللعابة قبل ما يمشيو لجنوب إفريقيا باش الا خسرو ميسبيوهاش فيه

عطى سعيد الناصيري، رئيس فريق الوداد الرياضي، اللعابة ديال الوداد بعض المنح لكانوا كيتسالو قبل ميسافرو لجنوب إفريقيا باس العبو الماتش ديال عصبة الأبطال الإفريقية.
الرئيس الوداد دار هاد الخطوة باش احفز اللاعبين من جهة لأنهم كانوا كاعين، ومقلقين، ومن جهة أخرى باش ماشي الى خسروا اقولو راه حنا ممخلصينش، وباش احيد عليه المسؤولية.
ومني سمع الناصيري اللاعبين مقلقين، وشاف الشوهة ديالهم مع الفتح الرباطي، فكر أنه اعطيهم شوية ديال المنح باش اهز ليهم المورال وقوليهم الى مربحتوش تحملون توما المسؤولية.
وبات الأمور في القلعة الحمراء كتعرف بعض التوثر بين الرئيس والحسين عموتة، مدرب الفريق، لمبغي حتى واحد ادخل ليه في المهام ديالو وفرض عليه اللاعبين، لأن عموتة حتى هو كاعي على قبل اللاعبين لخلاهم الناصيري مشاو وهما لكانوا هازين الوداد في خط الهجوم.
ودابا الوداد غادي القاو مشكل في خط الهجوم أنه مشا ليهم فابريس ومشا ليهم جيبور، وملاعبش بنشرقي لعندو جوج صفرات، داكشي علاش عموتة غادي احاول العب غير على المرتدات الهجومية وقوي الدفاع ديالو باش ميتمركا على الوداد حتى بيت.