سيتم حجب هذه الصورة تلقائيا عندما يتم الإبلاغ عنها من طرف عدة أشخاص.
فاجعة الصويرة: كنعيشو مسيرة ولد زروال جديدة. علاش الداخلية رخصات لهادا يدير هاد الشي ومنين جاب لفلوس ومع من خدام واش كدير التنمية البشرية باش يجي بحال هادا يقتل عباد الله وعلاش كينوضو جمعيات اخرى يبغيو يفرقو اعانات ما كيخليوهمش واش علاقة السياسة بهاد الشي
فاجعة الصويرة اللي ماتت فيها 15 مرا كلهن مساكن قتلهم الفقر والحاجة والدولة مسؤولة مسؤولية كبيرة فهاد الشي. 15 مرا جاو يقلبو على گفة ب160 درهم ودافعو وطاحت الروح. بيان وزارة الداخلية قال انه تم "فتح بحث قضائي تحت إشراف النيابة العامة لمعرفة ظروف وملابسات الحادث وتحديد المسؤوليات، وفتحت وزارة الداخلية أيضا تحقيقا إداريا شاملا في الموضوع" هاد الشي غير كذوب وزفوط وما عندو لا يؤخر لا يقدم. حقاش وزير الداخلية خاصو يتستاقل مباشرة. كيفاش فالريف وقعات مسيرات طيرات 9 الوزرا وهادو ماتو 15 مرا وكيكولو تحقيق شامل. مسؤولية وزارة الداخلية قائمة حقاش هي اللي رخصات لهاد خينا يوزع لگفة. يستغل الفقر ديال الناس. دابا هاد الشي اكثر من مسيرة ولد زروال. شكون هاد السيد وشكون عطاه الرخصة يدير هاد الشي فسوق اسبوعي. ياك كاينة المبادرة الوطنية للتنمية البشرية شكون كيسمح لهادا يدير هاد الشي. الفضيحة انه كل عام كيديرها ماشي اول مرة يعني لفضيحة كبيرة بزاف. الدولة تعرات بهاد الشي. ثم هاد السيد منين جاب هاد لفلوس وشحال من واحد عندو لفلوس اكثر وما يقدرش يدير بحال هاد الشي واش الداخلية كتخلي هاد الناس باش تستغلهم فالانتخابات؟ وارد جدا. عقلتو على ولد زروال وغزوتو فكازا. التحقيق عارفينو ما غادي يعطي والو. غير هادي فضيحة عراتنا كلنا
