هشام العسري او الغموض باش يخلق التميز. "ضربة فالراس" مشى فرجلين التجريد والنقيل من سينيمات مختلفة وضربنا بيه للراس

سينما هشام العسري ما كتعجبنيش. ما عنديش معاها. ما عنديش مع السينمائيين اصحاب الموعظة. كيجيوني بحالهم بحال دعاة الاصولية هادوك الفقها. انا من مدرسة كتبغي السينما اللي كتبهر كتمتع. فيلم كتفرج فيه كيصطيه او يفرحك او يخلعك. باختصار كيخلي فيك اثر كيف قالو النقاد لقدامى عن النص الادبي.
البارح مشيت شفت فيلم "ضربة فالراس" اخر افلامو. حسيت بالفعل بضربة فراسي باش حضرت. الفيلم على مستوى التصوير والمشاهد ووووو نيكال. ما عندي ما نقول. هادي مشكلة كبيرة كيوقعو فيها عدد من المخرجين المغاربة =الشكل= هشام العسري تجاوزها. فاتها. لكن واش بران فيكس ولا بلان سيكانس وتتابعها مع مونتاج مقاد كيعطي فيلم مقاد او فيلم سينمائي مؤثر. اللا. النموذج افلام العسري. صديق لي قال انه يكتب السينما. استغربت من وصفه. الكتبة فيها وفيها بحالها بحال السينما. ماشي تكتب مقاد كيعني مقال مزيان وقوي.
ما يثيرني فيما يقدمه العسري من افلام هو جبنه في التعامل مع مواضيع. يختار مواضيع كبيرة ويتهرب من الخوض فيها. كيرد باللي هو ما كيديرش السياسة. طبعا كيضحك علينا. تحف سينمائية رائعة ما دارتش افلام على السياسة وولات مرجع فالسياسة. القضية اذن قضية كيفاش نقلتي الموضوع كيفاش تناولتيه.
البارح فسينما الريف الجميلة بكازا قدم العسري فيلم فكرتو رائعة وتناولو سينمائيا مقود. بوليسي غادي يمشي يحضي كنطرة غادي يدوز منها الملك. البوليسي تضرب فاحداث الكوميرة 81. فهاد الكنطرة غادي يكون بين جوجت دواور. هنا غادي يعيش احداث تربطه بالحاضر بالماضي. ماضيه هو وحاضره. احداث سياسية واجتماعية. غير فهاد الشي كولو فين هو العسري. فين السينما ديالو. مشاهد مشفورة بكل وضوح من ايمير كوستوريتشا =مشهد لامبيلانس ومشهد الجوق ديال جوجت الدواور".
التشخيص كان فيه مشكل كبير. عزيز الحطاب كان مزيان مقابل لطيفة احرار اللي لعبات لطيفة احرار. بلا ما نهدر على الكليشيهات اللي جاو فالفيلم. كليشيهات جسدتها شخصية احرار امازيغية راجلها مشدود وما كيدخلش الشرطي الا ايلى حيد الشارة.
رغبة المخرج فتصوير الخضوع والذل والحط من الكرامة من خلال تكرار مشاهد اقرب الى العبودية عبودية شخص الملك ما كانش موفق فيها. كثر منها حتى بسالت.
العسري داير بحال شي حد شاف لوحات العظام فالفن التشكيلي وكتب شوية على تاريخ هاد الفن واحد النهار قال ممكن نكون منهم. غادي ناخد من هاد العظام كل واحد قوتو. اللون او البيرسبكتيف او الاضاءة والعتمة او شكل الشخصيات …. وغادي ندير لوحة خاصة بي. خلف الاحمر نهار جا عندو ابو نواس قال ليه باغي نولي شاعر قال ليه الجملة الشهيرة حفظ 10 الاف بيت شعري ونساهم. السعري حفض الافلام ونقل منهم وخرج مسخ وضربنا بيه للراس