حالتنا ولات تشفي العديان راه واخا يكون هاد الراكد بصح عمرو لافاق ولا يخرج إلى عرف راه الوقت ولات هاكة ، فين غادي يخرج فين

الأزمة على جميع النواحي ، والوقت راكدة ، هاعلاش الراكد كان هو الموضوع الوحيد هاد الأيام فالويب ، تدخل لليوتوب المغربي ، غتلقى عشرات الفيديوات على الراكد ومولاتو ، وجيران مولات الراكد ، وصحاب الراكد لي كيلعبو معاه ، وشحال من مرة تحرك الراكد ليوم ، وهافوقاش فاق الراكد هاد النهار ، وها آش قال الطبيب والعالم والفقيه والميكانيك والسودور والتريسيان والراقي فقضية الراكد ، حتى ولا الراكد قضية وطنية لدرجة العثماني قريب يسيفط لجنة لإيقاض الراكد ، وجطو قريب يزورو القضاة ديالو باش يحسبو تأثير هاد الراكد على الإقتصاد الوطني ، وشحال ضيع على البلاد كون كان فايق .
بزاف ديال الناس تعجبوا من هاد القضية وكاين لي سمع بيها أول مرة كاع بحال الى ماشي مغريبي ، غير هو لي خاص يعرفو الناس أن الراكد معتارف بيه القانون المغربي ومدونة الأسرة ، وفإثبات النسب راه الولد ينسب لأبيه إلى تزاد فمدة سنة من بعد الطلاق ، 3 اشهر زايدة على وقت الحمل لي هو 9 شهور ، وهذا هو الراكد والمذهب لي تابعينو حنا مذهب مالك راه فيه كثر من هاد المدة ، والإمام مالك براسو قاليهم راه دوز شي عامين فالحمل عاد تزاد حيث كان راكد ، وفالثقافة الشعبية الراكد حقيقة مؤكدة ، وحتى فقهيا ، لذا الراكد راه جزء من ديننا الحنيف ، ومكاين لاش نعتابرو الأمر من الخوارق والحاجات لي مايمكنش يوقعوا ، مادامأن الإنسام مؤمن بالباك كامل فراه الراكد كيمشي معاه.
شحال هادي الرجال كانو كيغيبو مدة طويلة على ديورهم سواء فطلب الرزق أو الحرب ، لذا بعد المرات ملي كانو كيرجعو كيلقاو شي دري مزيود او المرة حاملة واخا السيد غاب مدة طويلة ، والجواب كيكون هو كان راكد ، كاين حالات ديال موت الجنين فالبطن وكيبقى فالكرش مدة طويلة ، ولكن القالب ديال الراكد خرج عاى ود هادشي ، وطبعا تدارت ليه نصوص فقهية كتزكي هاد الفرضية وكتفصل فيها ، باش مايوقعش الشكلي فالعكلي وتتفكك عدة أسر على والو ، اللهم الراكد ، غير هو فهاد الوقت ديال العلم والتقنيات والتيكنولوجيا وتطور الطب واجهزة الكشف ، القضية صعابت شوية فمثل هاد القوالب ، ومع ذلك باقي بنادم كيتيق فهادشي وهذا أمر طبيعي وعادي جدا ، لي ماشي عادي هو يخلق الراكد ضجة أعلامية وتتجارى المنابر الصحفية تدير حوارات معاه شخصيا ، وترصد كاع التحركات ديالو ، ويتجمعو الأطبة ويديرو الخبرة ديالهم ، ومن بعد يجيو الرقاة من كاع المغرب يقراو على الراكد باش يفيق بحال إلا هو حنش ، ويتدخلو رقاة آخرين من مصر وبلدان أخرى وتولي القضية عالمية و ف2018 ، هذا هو الحماق بعينيه وهادي هي الحالة لي وصلات ليها البلاد ، اللاجدوى وقلة مايدار ومايتقال وصلات للجدر ، وحالتنا ولات تشفي العديان راه واخا يكون هاد الراكد بصح عمرو لافاق ولا يخرج إلى عرف راه الوقت ولات هاكة ، فين غادي يخرج فين .