بالفيديو: زيان محيح وهاز النيفو: حنا حمير ما درناش باسبورات النصارى وما سرقناش وخاصنا نتحاسبو فين مشاو فلوس الفوسفاط ونحاسبو مناجم على ذهب طاطا ونقرة تنغير وانا من رجالات المخرن ومتفاءل

محمد زيان المنسق الوطني لحزب المغرب الليبرالي محيح بزاف هاد ليام. تلقاه على جميع الجبهات اللي نايضة. تنغير وطاطا والريف وجرادة ديما حاضر. ديما واخد مواقف قوية بزاف.
اخر خرجة ليه عبر "كود" البارح الثلاثاء بالرباط طالب زيان بمحاسبة اللي شفر فلوس لمغاربة للي هربها. قال باللي خاص المحاسبة على فين مشاو فلوس الفوسفاط وباللي خاص نتحاسبو مع "مناجم" شركة تابعة للهولدينك الملكي "الشركة المغربية للاستثمار" على ذهب طاطا ونقرة تنغير
زيان هاجم الجهة اللي كتحاول تشد فيه وقال ما تصيفطوش لينا العياشة يسبونا فيوتوب حنا بغينا غير فلوس الشعب وديرو في ما بغيتو.
ثم اضاف "حنا حمير ما درناش باسبور النصارى وما سرقناش وما عرفناش نسرقو" وزاد "ما تندموناش حيت كنا مغاربة وبقينا مغاربة"
وطالب بالكف من هاد العبث حقاش غادي يزرع عاطقة الخيابة وكره الوطن وحب الدول الاجنبية
وعبر في اللقاء نفسه باللي هو متفاءل "انا متفائل انا من رجالات المخزن وبغيت المغرب يبقى فهياكله هي ريحة طيبة" واضاف انه يتوقع زلزال يعيد الامور الى نصابها