"كود": واش فرحانة بهاد البوز لكبير اللي درتيه باغنيتك "عطيني صاكي"؟ لقات اعجاب عند الناس لان التيمة جديدة ومغنياه الداودية بايقاع غربي. "كود": هاد الايقاع خليجي اكثر منو غربي؟ الداودية: للا غربي درت فيه لورك والكامانجا "كود": نبداو من اللول، كيفاش وصلاتك هاد الاغنية وقبيلتيها؟ الداودية: هاد الاغنية عطاها الملحن الرفاعي وكاتب الكلمات محمد الادريسي لفنانات معروفات وما قبلوهاش وباش تعرضات علي قبلتها "كود": شكون اللي رفضها؟ "الداودية": ما نكولش ليك وقتاش وصلاتك هاد الاغنية؟ الداودية: هادي 5 اشهر الملحن اقترح علي ثلاثة اغاني واختاريت اغنيتين منها "اعطيني صاكي". تلاقينا فسهرة فاوتار بمراكش وجلسنا وجا عندي للدار. "كود": وقتاش اقتنعتي بها؟ الداودية: اقتنعت بها باللي شفت بنتي الصغيرة اميرة اللي عندها اربع سنوات سمعاتها وبدات ترددها وتعاود فيها كود: بانت ليك الاغنية غادية ترفحي منها؟ الداودية: انا ماشي مادية تبعت الاحاسيس ديالي وشفت كيفاش تفاعلات بنتي معاها "كود": وقتاش بديتي تصورها الداودية: شهر نونبر دخلنا للاستوديو باش نسجلها ومن بعد مشيت للامارات باش نصور فيديو كليب، وهاد الشي اللي وقع فدبي وفابوظبي :كود": ونهاراش الفيديو كليب جاهز؟ الداودية: شي 15 اليوم يكون جاهز. انا كنت حطيت الاغنية فيوتوب يوم 8 يناير واليوم 28 يناير اي عشرين يوم وصلات 3 مليون مشاهدة كود: وقتاش حسيتي بهاد الاغنية حيحات؟ الداودية: باش شفتها دارت البوز بزاف كول هزة ارضية. الاتصالات بدات والتعاليق كثرات وشعرت بشي وحدين بداو يضربوني بالقرطاس. هاد الشي اللي وقع لي راه ديال الله سبحانه وتعالي حقاش كانت نيتي حسنة. كود: شي اتهموك بالفساد وشي اتهموك بالسرقة بحال الجزائريين؟ الداودية: هاد الشي ديال السرقة ماشي صحيح واخا انا مغنية ماشي كاتبة الكلمات، فاتهام الجزائر على هاد المقطع: فك انا كنت دايرة الثقة. هاد العبارة ما كيكولوهاش الجزائريين هما كيكولو مد لي ماشي عطيني. وانا كمنموت على الجزائر وعندي جمهور كبير ودرت اغنية مع قادر الجبوني. بالنسبة للاتهام بالفساد هاد الشي كلام فارغ. راه عطيني صاكي كتشجع على الفرحة والنشاط. فرحت لمغاربة فوقت الازمة وولات الاغنية حديث الساعة كود: نرجعو للسينكل اللي لحتيه فاليوتوب علاش درتي هاديك الصورة؟ الداودية: الناس ما داوهاش فيها الناس بزاف. كنشوف فسيدي ربي وكنشكرو كود: علاش هاد الاغنية؟ الداودية: انا ديما كندافع من صغري وانا كندافع حتى باش كنت كنلعب فامجاد سيدي عثمان كنت مدافعة، دافعت على اللباس المغربي ودافعت على بلادي ودافعت على الجلابة ودابا دافعت على لمرا المغربية الزوينة. هاد الاغنية دفاع على الجمال والانوتة. اغنية جديدة بتيمة جديدة وغناتها الداودية. كود: بزاف انتقادوك ووظف الدين لهاد الغرض؟ الداودية: انا كنخاف الله كود: واش انتي متدينة؟ الداودية: كون كنت متدينة كون حيدت الكامانجا والتزمت. حنا ضعاف وكنطلب من الله الهداية وكنحمدو ونشكرو على كلشي اللي عطاني
