شركة BDO للخبرة المالية. ناكل النعمة ونسب الملة فالمغرب: ما كتعتارفش بمغربية الصحرا واخا كتربح لملاير ومولاها هنا ها منصبو ودعوات باش يوقفو لمغاربة تعاملهم معاها

الصعيب فهاد البلاد هو تفتح لشركات دبر على مصيريف وتجمع لملاير ولكن كيضربك فالبلاصة اللي ضرك. هاد الشي اللي واقع مع شركة دولية للخبرة المالية BDO اللي مقرها الرئيسي كاين فليكسمبورگ وعندها مكاتب فكاع دول العالم حتى فكورديستان بلا ما ننساو اسرائيل والموزامبيق وفالمغرب عندها مقر فالدار البيضاء٬ غير هي هاد الشركة ما كتعتارفش بمغربية الصحراء حقاش كترفض التعامل فيها وكتعتابرها ارض ماشي مغربية.
هاد الشركة عندها مكتب فالدار البيضاء وفروع فمدن اخرى وكتستافد من امتيازات كثيرة وكتربح مزيان ولكن فالصحراء اوهوي ما باغياش تعتارف بمغربيتها واخا رئيسها هنا فالمغرب هو الباعقيلي نائب الهيئة الوطنية للخبراء الماليين.
السي الباعقيلي معاه السي زكرياء فهيم النائب السابق لجمعية ارباب العمل فالمغرب. هاد الجوج تشوفهم كيهدرو على الصحرا ويدافعو عليها تقول هنا نبات. غير بلا بلا بلا
هاد الشركة نشرات خارطة المغرب بلا الصحرا وما كتقلبش الخدمة فجهتي العيون الساقية الحمراء والداخلة وادي الذهب= شوفو الصورة= الشركة الام نفس الشيء =شوفو الصورة
دابا هادو عندهم مناصب ومسؤولين وجمعياتهم كتكذب على لمغاربة بخطابها اللي كيدافع على الوحدة الترابية ولكن باش تشوف خدمتهم كيديرو عكس ذلك.
دابا المشكلة ماشي فيهم هما. خاص الشركات المغربية تقاطع هاد الشركات اللي عندهم نظرة استعمارية علي المغرب. خاص يوقفو التعامل ديالهم معاها.