بنشماس واش كيضرب الياس العماري ولا حزبو لا كيضحك علينا حنا لمغاربة: كاليك مبادرة لصالح الريف. اش من مصداقية عندك انت وانت اصلا من اسباب هاد الاحتقان للي كاين اللي بحالو ولى الرجل الرابع فالدولة وسير كون تحشم

حكيم بنشماس الرجل الرابع فالدولة بحكم رئاسته لمجلس المستشارين ولد الريف اللي سكت على الحراك هادي 7 اشهر تحل ليه الفم. اش قال. كتب فمقال فهسبريس انه خاص مبادرة لحل أزمة الريف". مبادرة يمكن ما تحققش مطالب الحراك ولكن خاصها تكون. بنشماس قال "أتقاسم القناعة أيضا مع الذين يؤمنون بأن حساسية اللحظة التاريخية تستوجب من الجميع الترفع عن المزايدات العقيمة، وعن الاختلافات الحقيقية والوهمية من أجل توحيد الكلمة وتعضيد الجهود لإطفاء الحريق وتجنيب منطقتنا ووطننا السيناريو الأسوأ". وتابع بنشماش،"لقد عاينا على امتداد سبعة أشهر من الاحتجاجات بروز وانتشار خطاب ينطوي على درجة كبيرة من الخطورة؛ خطاب التبخيس (تبخيس مجهودات الدولة والمؤسسات) خطاب التهييج (بما رافقه من استدعاء ماكر للذاكرة والتاريخ) خطاب الشعبوية المقيتة (مسايرة الجماهير في مطالبها وأهوائها المعقولة منها وغير المعقولة على حد سواء)، خطاب التخوين الخ…"
شوف مول المبادرة. خدا موقف بحالو يستحيل ينجح فشي مهمة حقاش ولى طرف قبل ما يبدا.
السيد اضاف ان هذه المبادرة فيها اقرار "بعدالة ومشروعية الملف المطلبي لساكنة الريف" وتلغي التواجد الامني المكثف وتدعو الدولة الى التوقف عن الملاحقات والمتابعات في حق النشطاء، وتوفير أقصى الضمانات للمحاكمة العادلة لمن اعتقل من النشطاء، تمهيدا لتهييء الأجواء لصياغة ملتمس مرفوع للملك لإصدار عفو عن المعتقلين على خلفية الاحتجاجات.
مع جدولة زمنية عن مشاريع الدولة كل وزارة على حدة. من اخطر ما جاء في المبادرة "تكليف المجلس الاقتصادي والاجتماعي والبيئي لقيادة ورعاية مسلسل تشاركي" اي الحكومة تخرج منو والجهة اللي كيراسها ولي نعمته الياس العماري بالاضافة الى المجالس الجماعية اللي كلها فيد حزبو.
دابا شفتو المبادرة اجيو تشوفو على فاشلة من البدية. اي مبادرة باش تكون ناجحة خاص اللي كيطلقها تكون عندو مصداقية. السي بنشماس انت من حزب اللي هو جزء من المشكلة اللي واقعة فالريف. بغاو ناس الحراك يهاجمو مقراتو شحال من مرة وديما كيسبو قادتو. حزبكم عندو البرلمانيين وعندو الجماعات وعندو الجهة. يعني ماشي طرف محايد.
ثم علاش انت باغي دير مبادرة بلا حزب ديالك. اش من حاجة كتوجد. والادهى من هاد الشي كولو. انت وجودك فمجلس المستشارين من اسباب الاحتقان فالمغرب. كيفاش واحد معروف كيفاش نجح فمجلس المستشارين نجاح الفاشلين ماشي المتفوقين وخدا رئاسة هو عارف ما يستحقهاش يجي دابا يفهم. بغيتي مبادرتك تنجح ودير اعتراف دير قراءة نقدية لمسارك. قول حشومة انني نكون رئيس مجلس النواب حقاش عارف كيفاش حزبك دا الاصوات وكيفاش لعب لعب خطير فالانتخابات التشريعية.
السي حكيم ما طلعتي لا حكيم لا والو. بغيتي تلعب دور كيسيء اولا لصاحبك الامين العام للحزب الياس العماري. اللي خاصو يدير المبادرة هو مؤسسات بحال المجلس الوطني لحقوق الانسان اما المجلس الاقتصادي والاجتماعي والبيئي راه ما فيدوش شوفو اش دار فالصحرا. والو مشى وكتب ودار وكلشي طلع هدرة خاوية.
وسير تكمش وحشم على عراضك ولا كنتي ديموقراطي بصاح اعترف واقر باللي انت من مسببات الاحتقان فهاد البلاد