وتا شكون حاشاها ليه يا لشكر ياه. كاليك: غير مستعدين للدخول الى حكومة هشة" وحتى واحد ما بغاك لا مغاربة لا بنكيران كون تحشم ذليتي حزبك

موحالش كاين فالمغرب شي وجه صحيح بحال ديال ادريس لشكر الكاتب الاول لحزب الاتحاد الاشتراكي. السيد اللي شتت حزبو مزيان وذلو وخلاه كيجيب بالدفيع بزاف بزاف 20 مقعد وتحالف فالحقيقة ماشي تحالف قبل يكون مهان وتابع للبام طيلة الانتخابات وباش دازت وحول التبعية ديالو للتجمع الوطني للاحرار. رئيس الحكومة المعين عبد الاله بنكيران ما باغيهش بحال الشعب اللي لاحو. اليوم الاربعاء 08 مارس 2017 بلا حيا بلا حشمة دار ندوة صحافية فمقر الحزب كاليك على مستجدات تشكيل الحكومة اللي اصلا ما باغيه حد فيها.
ما نطولوش عليكم. نشوفو اش قال هاد المخرب لحزب الوردة اللي رجعو مدلول مهان. "غير مستعدين من الدخول إلى حكومة هشة، ولن نقبل بالاستفزازات المستمرة لرئيس الحكومة باستعماله لقاموسه الذي يسيئ للديمقراطية الناشئة ولسمعة البلاد على المستوى الخارجي". هاكاوا شكون كيشوه لبلاد واش هاديك شبيبتك اللي دخلات البوليساريو لا هاديك اللي ولات فالمرأة الاتحادية ديال الاممية الاشتراكية اللي عولات على دعم الجزائر والبوليساريو.
نكملو اش كال واخا صعيب الواحد يسمع ليه ويخليه يدوز هاد التخاريف لانه كيهين المغربي بهاد لكلام. كال "حزبي مع مع عزيز أخنوش،، باعتباره شريكا في المرحلة حول تحليل وتفسير أوضاعها. إلى حدود الساعة كلانا نمد يدنا لرئيس الحكومة وبجوجنا أكدنا رغبتنا في الدخول إلى الحكومة"
موحالش الواحد يصبر معاه. كيفاش متحالف مع اخنوش. السيد عطاوه مهمة ويالله بدا فيساع ولى حليف وكتكلم بجوج. وليتي بحال هاداك المردة اللي سولوه شحال كتاخد =هادي شحال هادي= كاليهم انا والقايد 140 الف. كي السطل كي القب.
شوفو التناقض كيسب فرئيس الحكومة وباغي يدخل بزز. وشوفو الوقاحة. نكملو. قالينا لشكر باللي بنكيران "أساء لمؤسسة رئاسة الحكومة بعجرفته ونرجسيته في التعامل مع الفرقاء السياسيين" وان عليه "أن يبلغ الملك فشله في تشكيل الحكومة".
دابا شي واحد كال ليه نوض هدر ودوي مهمتك هي دير الحيحة. راه الملك راجع غدا. مهمة تسيء لحزب احبه يوما المغاربة حقاش كان كيشبههم كانو كيقلبو على الكرامة ماشي الذل والاهانة
لشكر زاد "الملك محمد السادس، لم يعين العدالة والتنمية وإنما عين عبد الإله بنكيران، رئيسا للحكومة، وهذه من الأخطاء القاتلة التي وقعنا فيها، وهي الخلط بين المؤسسة الحزبية ومؤسسة رئاسة الحكومة"، "السرعة التي طبعت تفاعل الملك مع مقتضيات الدستور، قابلها بطء شديد من لدن رئيس الحكومة في تكوين الأغلبية".
غا كول لينا يا دريس على من كتكذب. اولا كتضحك على لمغاربة حقاش عارفين علاش الحكومة ما تشكلاتش. وكون كنتي عندك غير شوية الجرأة كول الحقيقة. راك كنتي فاجتماع 8 اكتوبر وعارفو علاش كان واش كانت اهدافو. ثانيا انت غير معني بهاد الحكومة وزم فمك الله يهديك ولا ما تقدرش خاصك تبقى حالو ودير هاد الخرجات المهينة لحزبك للمغربي اللي صوت.
سير راه شوهتي بالوردة سير