والايني هاد اللحايا حماق شوية ! مشاو جبدو تصويرة مهندس سعودي و كايروجو ليها على انه “ستيفن هاوكينغ العرب” شوف عقدة النقص فين واصلة ! وا لي عندو عندووو !

واحد التصويرة ديال واحد السيد سعودي كاتروج مؤخرا فالأوساط الخوامجية بزاف ! كايهضرو عليه بصفته مهندس سعودي تحدى الاعاقة و قدر يولي مهندس و رجل أعمال يسير مجموعة من الشركات ! حتى لهنا القصة مزيانة و ماكاين مشكل ! السيد تحدى الاعاقة وي ! و قرا فميريكان ممكن ! و خدا ديبلوم هندسة ممكن ! و كايسير مجموعة من الشركات و حتى هادي حاجة ممكنة و وواردة ! و لاكانت حقيقية برافو عليه.
و لكن ماديروش ليه عاوتاني ديك هاكو هاك و شوية ديال الماركوتينغ الاسلامي على اساس انه نابغة ! و لا على اساس انه “ستيفن هاوكينغ العرب” كيما بغيتو ترضوه! راه لكل مقام مقال ! و لا تزر وازرة وزر أخرى !و سمحو ليا بالزربة مايمكنش تقارن مهندس بنابغة و عالم كبير فحال ستيفن هوكينغ غا حيت عندهم نفس المرض !
مايمكنش !
ثم مالكم نتوما على هاد السم ؟
وا مالكم مراض آ صاحبي ؟
وااااااا ستيفن هاوكينغ عالم و نابغة و واعر و العالم كلو كايشهد ليه بهادشي و العالم تأسف عليه ! الآسياويين تأسفو عليه و الاوروبيين تأسفو عليه و الكوحل تأسفو عليه ! و امة لاااااا آله إلا الله تأسفات عليه ! إلا نتوما من دون الناس عقدة النقص غاتحمقكم ! غادين جابدين تصويرة سيد معاق و كاتروجو ليها على اساس ” تاحنا عندنا ديالنا ” هههههههههه!
وا شكون داها فيكم غا قولو ليا شكون ؟ شكون حاشاها ليكم ؟ واش شفتو الكاميرونيين ناضو كايحطو تصويرة شي كاميروني و كايغوتو ” تاحنا عندنا ديالنا ” ! شفتو ” الجابونيين” ناضو حطو تصويرة شي معاق كايغوتو ” تاحنا عندنا ديالنا ” ! غا نتوما سبحان الله العظيم لي كاتقاقيو كي الدجاج ! ققققققققق تاحنا ققققق عندنا قققق ديالنا !
وا راه لي عندو عندو ! و الدول لي فيها العلماء راه فيها العلماء.
الدول لي عندها العلماء ديال بصح ( ماشي علماء الضراط و احكام الحيض و النفاس) راه كاتبان عليها ! كايبان التأثير ديال دوك العلماء لي كايديرو البحث العلمي الحقيقي ! و كاتستافد منهم الدولة فمجالات عديدة فحال الطب و التيكنولوجيا و التعليم و الالكترونيك … هادو هوما العلماء ديال الربح !لي كايجي فطريقهم الخير للانسانية كاااااااملة ! العلماء لي كايتباهاو بيهم الناس و كايتعناو بيهم الدول ( ستيفن هاوكينغ، داروين، نيوتن ….) العلماء لي بغاو يفهمو الكون ! بغاو يفهمو كيفاش و علاش و … و ساهمو بالعمل و العلم ديالهم فتقدم الانسانية و لي بفضلهم اليوم الانسان وصل يصنع الصوارخ و يختارق السما ! العلماء لي كل نهار كايخدمو و يقلبو و يبحثو و يغلطو و يصححو الغلط باش نتا آ بوخنونة تهز التربية لي يا الله تزادت عندك و تمشي تجري تشد النوبة فسبيطار الحومة باش دير ليها الفاكسان ديال البيسيجي و العواية !
ماشي علماء الخرافة ! فرانكينشطاينات !
علماء الجهل !
علماء الحقد و الظلامية !
و بزاف عليكم أصلا هاد السمية ديال “علماء” حيت بينكم و بين العلم غي الخير و الاحسان ! وليتو دايرين فحال دوك المغنيين ديال الكاباريات طروازيام ديفيزيو كاتلقاه عاطيها غير للقايج فالكاباريات و مامعروفش وماعدو جمهور و هكاك عاطي لراسو شي لقب ” كبير عليه بزاف” “سفير الأغنية الدكالية ” ” عميدة الأغنية للشعبية” ” سلطان الكامانجة ” معلقينو فوق سميتو فالدخلة د الكاباري ! تانتوما ماكاين غا ” الشيخ الفلان فلاني ” ” العالم الفرتالاني” ” الداعية الفعناني” … بلا خبار المجلس العلمي ! داكشي علاش غانعاود نقول لي عندو عندو !
غاتقوليا تاحنا كانو عندنا علماء”نا”! ايه تانتوما كانو عندكم علماء”كم” و لكن شنو دارو ليهم جدودكم ؟ علاه ابن رشد شكون حرق ليه كتوبتو ؟
و الرازي شكون سماه الكافر الزنديق منكر النبوؤات ؟
و الكندي شكون لي سلخو بالمشويطة ؟
و ابن الهيثم !و بن طفيل ! و الرازي و بن سينا لي كان واحد الاستاذ ديال التربية الاسلامية فالسيزيام آني كايقولينا عليه ” بن سينا الحشاااااش” !
ياك جدودكم لي قتلو العلماء و جراو عليهم و سلخوهم بالمشويطة و تاهمو أغلبهم بالزندقة و الكفر و الالحاد …
غا لي هز الراس و نوا يفكر ويخدم دماغو كايطيرو لبوه الركبة بالسيف !
قراو التاريخ ! وا قرا تاريخك آ بولحية و تاريخ جدودك باش تعرف علاش لي عندو عندو ! و تصويرة معاق سعودي ماغاتغير والو فكونكم شعوب لا توفر بتاتا المناخ للعلم و العلماء باش ينبتو و نستافدو منهم !
” الشاذ لا يقاس عليه و النادر لا حكم له “