بنادم لي غير ساكت ماشي بالضرورة ساكت حيت "حكيم" و لا حيت كايدير " الانصات" و لا " الانجاز"، كاين لي ساكت غي حيت ماعندوش الجرأة يهضر و كاين لي ساكت غي حيت واخا يبغي يهضر ماعندو مايگول و كاين لي ساكت غا حيت ماداير تا إنجاز يهضر عليه

—
مؤخرا الناس دارو هاشتاغ فوسائل التواصل الاجتماعي ديال "هضر آ صاحبي" موجه لرئيس الحكومة العثماني لي من نهار طلع للرئاسة و هو ضارب الطم! تغتاصبات بنت فالطوبيس ضرب الطم ! وقفات الحركة التجارية فالگرگرات ضارب الطم! ماكانسمعوه ماكانشوفوه! العثماني في الرد ديالو على هاد القضية قالك بلي هوما حكومة " الانصات و الانجاز" ! زعما فحالا الانصات و الإنجاز لا يجتمعان مع التواصل، يا إيما نهضرو يا إيما نخدمو ، مايمكنش يكونو بجوج.
هاد الفكرة لي طرح العثماني ماشي فكرة عادية و صافي راها ثقافة كاتلقاها متجذرة فالعقلية العربية عامة و المغربية خاصة، و شكون غايكون نسا ديك الجملة الشهيرة لي علموها لينا فالمدرسة و كاتبوها لينا بالجير فوق الحيوط " إذا كان الكلام من فضة فالسكوت من ذهب" ، السكوت، الصمت، ثقافة ضريب الطم و فاش كايبغيو يكاموفليوها و يكملوها و يجملوها كايصورو ليك داك الانسان لي "صامت" على أنه "حكيم" ! و كاتكبر و نتا فللاوعي ديالك كاتشوف بلي الصمت حكمة و بلي لي كايخدم ماكايدويش و بلي " الكلب لي كاينبح ماكايعضش" … في حين فالقسم نيت لي تعلمتي فيه هاد الجملة ديال " السكوت من ذهب"، كاتلقا أغلبية الدراري لي ساكتين و ضاربين الطم ما حكماء ما تاخرية، يا إيما مامسايرينش و ماعندهمش المستوى ! يا إيما معقدين ! يا إيما ماعندهمش الشجاعة باش يهزو صبعهم و يهضرو و يتناقشو و يتجاوبو مع الأستاذ ! و واخا هكاك كايبقا المجتمع و المدرسة كايروجو لهاد الفكرة المغلوطة ديال " السكوت من ذهب! و كايجينا سي العثماني باش يقولينا بلي " نحن حكومة الإنصات و الإنجاز" فحالا التواصل غا خضرة فوق طعام ! فحالا التواصل و الانجاز و لا التواصل و الانصات ماكايجتتمعوش!
ايوا لا ! سمح ليا بالزربة ! هاد الهضرة ماكايناش! هاد الهضرة كاتگال للناس باش تنعسهم ! باش تسكتهم ! باش يكبرو ضاربين الطم مايدويوش على شنو ضارهم و على افكارهم و طموحاتهم و ممسوحة ليهم ملكة النقد من الديسك دير كايعرفو غي "السمع و الطاعة" ! " السكوت ماشي من ذهب" و بنادم لي غير ساكت ماشي بالضرورة ساكت حيت "حكيم" و لا حيت كايدير " الانصات" و لا " الانجاز"، كاين لي ساكت غي حيت ماعندوش الجرأة يهضر و كاين لي ساكت غي حيت واخا يبغي يهضر ماعندو مايگول و كاين لي ساكت غا حيت ماداير تا إنجاز يهضر عليه "! أعتى السياسيين و رجالات الاقتصاد و العلم فالعالم كايتواصلو و كاتلقاهم حاضرين ناضرين فوسائل التواصل الاجتماعي و المنابر الاعلامية و حتى من مدرجات الجامعات كايمشيو ليها و يهضرو فيها! ترامب رئيس ميريكان ماكادوزش فرتيتة ديال حدث فميريكان بلا مايعلق عليها فالتويتر ديالو ! ماكرون ديال فرانسا حاضر بقوة فالفايسبوك ! مارين لوبين كذلك ! حتى من علي بونگو اوديمبا ديال الگابون و بول كاگامي ديال رواندا لادخلتي للصفحات ديالهم على مواقع التواصل الاجتماعي غاتلقاهم حاضرين ناضرين بالصوت و الصورة و الكلمات!
ايوا ؟ واش غير نتوما لي كاديرو " الإنجاز" و " الانصات" هاد الناس كاملين ماكايديرو والو؟
أنا شخصيا هاد الهضرة ماكادخلش ليا لراسي، و كانشوف الانسان لي ماكايهضرش غالبا مريض ! ولا معقد ! و لا عندو شي مرض نفسي و ماضاربش الفگد فراسو !
راه الخطابة فن ! التواصل فن ! واش غير آجي و هضر ؟ و الله باباك و ماعندك الكاريزما و الشجاعة و الدماغ عامر لاهضرتي و نجحتي و ووصلتي بالهضرة ديالك !
و الناس لي فمناصب حساسة، خصوصا السياسيين مفروض عليهم أنهم يتواصلو مع الشعب و يتواصلو مع الاعلام و يتواصلو المنظمات الدولية! ماشي غاتسد عليك فبيت بوحدك واحد خمس سنين ماتدوي مع حد ماتحاشيها لحد ! جا الفيضان يلقاك ساكت ! جا الاغتصاب يلقاك ساكت! جا الطوفان يلقاك ساكت ! راه سميتها رئاسة الحكومة آ سي العثماني ماشي الخلوة الصوفية ديال البوتشيشيين فمداغ!
ماشي حيت جا واحد المعقد ولد المعقدة قال ديك الجملة ديال "السكوت من ذهب" باش يغطي على الخوف ديالو و جاو الهبال موراه كايعاودوها موراه باش تاحنا نتيقوها و نرضوها دوفيز فحياتنا و حياة ولادنا!
السكوت ماشي من ذهب!
و الانصات مطلوب ! و لكن التواصل حتى هو !
و الانجاز مطلوب ! و التواصل حتى هوا!
L'un n'empêche pas l'autre.